საფრანგეთის ჩრდილო-დასავლეთ რეგიონის, ბრეტანის ქალაქ ლანდევენეკის ქალაქის მერმა ადგილობრივ სანაპიროებზე ცურვა აკრძალა, მიზეზი კი დელფინი გახდა, რომელიც დაჟინებით ცდილობდა მოცურავეებთან კონტაქტი დაემყარებინა.

რამდენიმე კვირის განმავლობაში დელფინი, სახელად ზაფარი, საფრანგეთის ბრესტის სანაპიროზე ადამიანების მხარდამხარ ცურავდა და ბავშვებს ართობდა, თუმცა ცოტა ხნის წინ მან ლანდევენეკის რაიონში გადაინაცვკა. ქალაქის ჩინოვნიკები ფიქრობენ, რომ ცხვირბოთლა დელფინი შესაძლოა ადამიანებთან ახლო კონტაქტის დამყარებას შეეცადოს. დელფინის ქცევამ უკვე შეაშინა რამდენიმე მოცურავე.

„მე ვაწესებ აკრძალვას, ადამიანების დასაცავად“- განაცხადა ქალაქის მერმა როჟე ლარმა. როგორც გაზეთი Le Telegramme იუწყება, დელფინი აგრესიულად არ იქცევა, თუმცა ახლოს მიდის მოცურავეებთან. ივლისის თვეში ერთ-ერთ მოცურავე ქალს დელფინი ნაპირზე დაბრუნების საშუალებას არ აძლევდა და საჭირო გახდა მაშველების დახმარება.

შემთხვევა, რის გამოც ხელისუფლებამ აკრძალვა შემოიღო, გასულ კვირას მოხდა, ზაფარმა მოცურავე გოგონა ცხვირით ჰაერში ააგდო.

მერის თქმით, ცურვაზე და ყვინთვაზე აკრძალვა იმ დღეებში იმოქმედებს, როდესაც დელფინს სანაპიროსთან შეამჩნევენ. ასევე აკრძალულია ძუძუმწოვართან 50 მეტრზე მიახლოვებაც.

ბრეტანის ოკეანარიუმის ექსპერტი აცხადებს, რომ დელფინის ქცევები სახიფათოა, რადგან მას შეუძლია მოცურავეს კუდით უნებლიე ზიანი მიაყენოს.