„ეფიქს ბიზნეს გრუპის" დამფუძნებლების დაკავება - ადვოკატი ბრალდების აბსურდულობაზე საუბრობს

სამართალი - 20:56, 21 Aug, 2018

3542

ეფიქს ბიზნეს გრუპის დამფუძნებლებს შსს თაღლითური სქემით დიდი რაოდენობის თანხების მითვისებაში ადანაშაულებს. უწყების ინფორმაციით, დანაშაულებრივი ჯგუფის წევრებმა, დაახლოებით, 50 მოქალაქე მოატყუეს, რომ სავაჭრო ბირჟაზე წარმოადგენდნენ საშუამავლო საბროკერო კომპანიას და იმ შემთხვევაში, თუ ისინი განსაზღვრულ ანგარიშზე თანხას შეიტანდნენ, კომპანია მათ სავაჭრო ბირჟაზე გარკვეული თანხების მოგებაში დაეხმარებოდა. დანაშაულებრივი სქემის მიხედვით, ბრალდებულებმა მათ მიერ წინასწარ განსაზღვრულ ანგარიშზე მოქალაქეებს შეატანინეს სხვადასხვა ოდენობის თანხები, რის შემდეგაც, ხელოვნური მანიპულირებისა და კომპიუტერულ სისტემაში უკანონოდ შეღწევის გზით, შეცვალეს დაზარალებულების კომპიუტერული მონაცემები, რათა მათ ეფიქრათ, რომ თანხა წარუმატებელი ვაჭრობის შედეგად წააგეს და კომპანიის მიმართ პრეტენზიები არ ჰქონოდათ. ამ გზით, დანაშაულებრივი ჯგუფის წევრები უკანონოდ დაეუფლნენ, დაახლოებით, 500 000 ლარს.

დაზარალებულების განცხადებით მათ რისკებს სათანადოდ არ აცნობდნენ, ხელშეკრულებაზე ხელი ბევრს არა აქვს მოწერილი და ფული ნდობის საფუძველზე გადარიცხეს.

საწინააღმდეგო ვერსიას აჟღერებს ეფიქს ბიზნეს გრუპის დამფუძნებლების ადვოკატი. მისი თქმით, ყველა პირმა, რომელსაც კავშირი ჰქონდა კომპანიასთან, დაზუსტებით იცოდა, რა საქმიანობას ეწეოდა კომპანია.

"ყოველგვარი განცხადება, რომ რომელიმე კლიენტთან მოტყუებით გაფორმდა ხელშეკრულება ან მოტყუებით იქნა მიღებული თანხა, არათუ აბსურდულია, შინაარსს მოკლებულია. არცერთ შემთხვევაში არ ჰქონია სამართალდარღვევას ადგილი," - ამბობს ბრალდებულის ადვოკატი, ზაზა ქაჩიბაია.