მეცნიერები აცხადებენ, რომ აქვთ უტყუარი დამამტკიცებელი საბუთები მთვარეზე ყინულის არსებობის შესახებ, რომელიც წყლის გაყინვის შედეგად არის წარმოქმნილი.

ყინული მთვარეზე არსებობს როგორც მის ჩრდილოეთ, ასვე სამხრეთ პოლუსზე და იგი საკმაოდ დიდი ხნის წინ წარმოიქმნა.

ეს დასკვნა ასტროფიზიკოსებმა ინდოეთის მისია Chandrayaan-1-ის მიერ მოწოდებული ინფორმაციის შედეგად გააკეთეს. კვლევა ჟურნალ Proceedings of the National Academy of Sciences (PNAS)-ში გამოქვეყნდა.

ყინულის განაწილება პოლუსებზე არათანაბარია. სამხრეთ პოლუსზე იგი მხოლოდ კრატერების ფსკერზე გვხვდება, ჩრდილოეთით, ყინული უფრო იშვიათად გვხვდება და უფრო დიდ ფართობზეა გადანაწილებული.

ინდურმა აპარატმა M3 დააფიქსირა არა მარტო სინათლის არეკვლა ყინულის მდებარეობის ზედაპირიდან, არამედ ზუსტად განსაზღვრა, თუ როგორ შთანთქავენ მისი მოლეკულები ინფრაწითელ შუქს, რის მეშვეობითაც განასხვავა ერთმანეთისგან წყალი, ორთქლი და ყინული.

მთვარის ზედაპირზე დღისით ტემპერატურა 100 გრადუს ცელსიუსს აღწევს, რაც ყინულისთვის არახელსაყრელია, თუმცა რადგან მთვარე მისი ღერძიდან 1,54 გრადუსითაა გადახრილი, მის პულუსებზე არის ადგილები, რომლებზეც მზის სინათლე არასდროს აღწევს. აქედან გამომდინარე პულუსებზე ტემპერატურა -157 გრადუს ცელსიუსით არ აღემატება და ყინულიც არ დნება.

ასტრონომები აცხადებენ, რომ თუ ყინული საკმარისი რაოდენობითაა, ის შეიძლება წარმატებით გამოიყენონ ადამიანებმა მთვარეზე ყოფნის დროს.

აღსანიშნავია, რომ წყლის ყინული სხვა პლანეტებზეცაა აღმოჩენილი - კერძოდ მერკურის ჩრდილოეთ პოლუსზე და ჯუჯა პლანეტა ცერესზე.

_{სურ: მთვარის სამხრეთ პოლუსი. გადაღებულია იაპონური კოსმოსური ხომალდიდან}