23 წლის ჯარისკაცის მკვლელობა ქარელში - შსს-მ ბრალდებული დააკავა

სამართალი - 20:17, 20 Aug, 2018

8295

ქარელში, სოფელ ხვედურეთში მე-13 ბატალიონის ჯარისკაცი მოკლეს. არსებული ინფორმაციით, ჯარისკაცს ჭრილობები სანადირო თოფით აქვს მიყენებული.

შინაგან საქმეთა სამინისტროს შიდა ქართლის პოლიციის დეპარტამენტის დეტექტივებისა და ქარელის რაიონული სამმართველოების თანამშრომლებმა, ჩატარებული ოპერატიულ-საგამოძიებო მოქმედებების შედეგად, 1973 წელს დაბადებული თ.თ., განზრახ მკვლელობის ბრალდებით, ცხელ კვალზე დააკავეს. დანაშაული 7-დან 15 წლამდე ვადით თავისუფლების აღკვეთას ითვალისწინებს.

ბრალდებული თემურ თედოზაშვილი, რომლის სანადირო თოფიდან გასროლილ ტყვიას 23 წლის ახალწვეული ემსხვერპლა, მომხდარზე არ საუბრობს.

სოფელში კი ამბობენ, რომ გარდაცვლილსა და ბრალდებულს შორის კონფლიქტი არ მომხდარა და ახალგაზრდა ჯარისკაცი უბედურ შემთხვევას ემსხვერპლა.

როგორც უწყებასი აცხადებენ, გამოძიებით დადგინდა, რომ ბრალდებულმა ქარელი-სკრა-გორის დამაკავშირებელი გზის მიმდებარე ტერიტორიაზე, ტყესთან ახლოს, თანასოფლელს - 1995 წელს დაბადებულ გ.მ.-ს სანადირო თოფიდან გასროლით სასიკვდილო ჭრილობა მიაყენა, რის შემდეგაც მიიმალა. გ.მ. შემთხვევის ადგილზე გარდაიცვალა.

სამართალდამცველებმა, ჩატარებული საგამოძიებო მოქმედებების შედეგად, თ.თ. დააკავეს, დანაშაულის ჩადენის იარაღი კი ნივთმტკიცებად ამოიღეს.

გამოძიება განზრახ მკვლელობის ფაქტზე, საქართველოს სსკ-ს 108-ე მუხლით მიმდინარეობს.