"შეპყრობილი" იგივე Fi - ახალი შოკისმომგვრელი თურქული სერიალი ქართულ ტელესივრცეში

ეს საინტერესოა - 13:21, 20 Aug, 2018

28897

ქართულ ტელესივრცეში ახალი თურქული სერიალის Fi-ს ჩვენება იწყება. სერიალის სახელწოდების ქართული ვარიანტია „შეპყრობილი“. სერიალი PuhuTV-ის ინტერნეტ პროექტია, თუმცა ინტერნეტში ჩვენებას მისთვის ხელი არ შეუშლია, რომ თითოეულ სერიას 10 მილიონზე მეტი მაყურებელი ყოლოდა.

სერიალი შექმნილია თურქი მწერლის აზრა კოჰენის ტრილოგიის Fi, Çi, Pi-ის მიხედვით.

Fi რადიკალურად განსხვავდება სხვა თურქული სერიალებისგან, როგორც სიუჟეტით, ასევე თამამი სცენებითაც.

თუ გიყვართ გენიალური გიჟები მაშინ ეს სერიალი თქვენთვისაა. სერიალის მთავარი პერსონაჟი არის ჯან მანაი - მილიონერი და თანამედროვე ლურჯწვერა, ტელევარსკვლავი, ნიჭიერი ფსიქოთერაპევტი და ამავდროულად წარსულით ავადმყოფურად დაავადებული, ცინიკოსი, ვუაერისტი, ფეტიშისტი, ემოციური, ლირიული და რომანტიული, მატერიალურად და გონებრივად მდიდარი. მიუხედავად მის ცხოვრებაში ქალების დიდი სიმრავლისა, საოცრად მარტოსული.

ჯანი შეპყრობილია სილამაზის თეორიით, რასაც ხორცი შეესხმება მას შემდეგ რაც, მარტოხელა ჯან მანაის ჰორიზონტზე მოცეკვავე გოგონა დურუ გამოჩნდება. დურუ იქცევა ჯანის წარსულის კოშმარების ტრიგერად და ახლა ადამიანების სულის ექიმს თავად ჭირდება ექიმების დახმარება.

ფილმის დევიზია: "მოერიდე საკუთარ თავს" ან "არ გააღვიძო შენში ურჩხული"

ამ სერიალში არის სიმდიდრე, სიღარიბე, სექსი, რომანტიკა, ფსიქიატრია, სილამაზე, კლასიკური მუსიკა და ამ ყველაფრის ნაზავი საინტერესო სანახაობას ქმნის.

ჯან მანაი - ტელევარსკვლავი, ფსიქიატრი და ლექტორი. მის როლს თურქი ვარსკვლავი ოზან გუვანი ასრულებს, ქართველი მაყურებელი მას იცნობს სერიალიდან „დიდებული საუკუნე“, სადაც ის ჰიურემ სულთანის თანამოაზრის და მარჯვენა ხელის რუსტემ ფაშას როლს ასრულებდა.

დურუ - დამწყები მოცეკვავე, რომელიც შემოქმედებით ძიებაშია. მის როლს თურქი ლამაზმანი, 2010 წლის მის თურქეთი სერენაი სარიკაია ასრულებს. სერენაის ქართველი მაყურებელი იცნობს სერიალიდან "ტიტების დრო"

დენიზი - მუსიკოსი და კომპოზიტორი, დურუს შეყვარებული. მის როლს თურქი ვარსკვლავი, მეჰმეთ გუნსური ასრულებს, ქართველი მაყურებელს ის კარგად ემახსოვრება სერიალ „დიდებული საუკუნიდან“ სადაც ის სულთან სულეიმანის ვაჟის მუსტაფას როლს ასრულებდა.

ბილგე - ჯან მანაის სტუდენტი, რომელიც განსაკუთრებული ნიჭიერებით და ამასთანავე უცნაურობებით გამოირჩევა, ის ჯან მანეს ერთგული თანაშემწეა. მის როლს ბურშა დეველი ასრულებს.

ოზგე - ჟურნალისტი, რომელიც ჯან მანაის წარსულში იქექება და სწორედ ეს იქცევა მისი ცხოვრების მთავარ განსაცდელად. ოზგეს როლს ბერაკ ტუზუნატაჩი ასრულებს. ისიც როგორც ამ სერიალის მსახიობთა უმრავლესობა ქართველი მაყურებლისთვის „დიდებული საუკუნიდანაა“ ცნობილი, სადაც ის უფლისწულ მუსტაფას ცოლის, მიჰრუნისა სულთნის როლს ასრულებდა.