გენერალ ქუთათელაძის მეუღლე გიორგი ჭანტურიას უმკაცრესად დასჯას ითხოვს

სამართალი - 16:43, 08 Aug, 2018

2089

ე.წ. სტამბულის ბაზრობის ტერიტორიაზე მოკლული გენერალ ქუთათელაძის მეუღლე მეგი სირბილაძე მკვლელობის საქმის გამოძიებით კმაყოფილია და პოლიციას გიორგი ჭანტურიას დაკავებისთვის მადლობას უხდის.

მისივე თქმით, ოჯახისთვის ცნობილი იყო, რომ მკვლელი გიორგი ჭანტურია იყო, რადგან სიმონ ქუთათელაძეს კონფლიქტი სხვა პირთან არ ჰქონია.

მეგი სირბილაძე ასევე განმარტავს, რომ მის მეუღლესა და დაკავებულ ჭანტურიას შორის დავა რამდენიმე თვე გრძელდებოდა და ის ბიზნესწილებს უკავშირდებოდა.

ის სასამართლო პროცესების ობიექტურად ჩატარების და გიორგი ჭანტურიას უმკაცრესად დაისჯას ითხოვს.

„სწორად წარმოებული გამოძიება ობიექტური შედეგით დამთავრდა. მე და ჩემს ოჯახს გვინდა დიდი მადლობა გადავუხადოთ შსს-ს და ყველა სამართალდამცველს, ვინც მონაწილეობდა ამ საქმის გამოძიებაში. ისედაც ვიცოდით, რომ მკვლელი დაკავებული პიროვნება იყო და ამის საფუძველიც გვქონდა, რადგან მასა და ჩემს მეუღლეს შორის დიდი ხნის მანძილზე არსებობდა ფინანსური უთანხმოება. სწორედ ეს უთანხმოება იყო მკვლელობის მოტივი. საკმაოდ ხმამაღლა შემიძლია განვაცხადო, რომ ჩემს მეუღლეს სხვა პიროვნებებთან არანაირი კონფლიქტი არ ჰქონია, ის საერთოდ უკონფლიქტო პიროვნება იყო. ამით მე ვპასუხობ დაკავებული პირის ოჯახის განცხადებას, თითქოს ჩემს მეუღლეს არაერთ ადამიანთან ჰქონდა კონფლიქტი“,-აცხადებს მეგი სირბილაძე და იმედს გამოთქვამს, რომ სასამართლო გაითვალისწინებს გამოძიების ყველა დეტალს და მკვლელი კანონის მთელი სიმკაცრით დაისჯება"- განაცხადა სირბილაძემ.