თბილისის საქალაქო სასამართლომ ტერორიზმის საქმეზე მიმდინარე გამოძიების ფარგლებში, იარაღის უკანონოდ შეძენა შენახვის ბრალდებით დაკავებულ მალხაზ ტოხოსაშვილს აღკვეთის ღონისძიების სახედ პატიმრობა შეუფარდა.

როგორც პროკურორმა ნანა ხუნჯუამ პროცესზე განაცხადა, გამოვლინდა, რომ მალხაზ ტოხოსაშვილი არის „ისლამური სახელმწიფოს“ იდეოლოგიის გამზიარებელი, ვინაიდან გამოძიების ფარგლებში მტკიცდება, რომ ტოხოსაშვილს ინტერნეტკავშირი აქვს "ისლამური სახელმწიფოს" წარმომადგენლებთან.

„ისეთი ბრალდებები მოვისმინე, მე თვითონაც ბევრი რამე მიკვირს. გამოკითხვის შედეგად, თუ ვინმე ოდესმე საეჭვოდ დამახასიათებს, გავიზიარებ თქვენს ბრალდებას. ამოღებული ვაზნებიდან ზოგი დაშლილი, ზოგი მულაჟი იყო", - განაცხადა მალხაზ ტოხოსაშვილმა პროცესზე.

ადვოკატის განცხადებით, ტოხოსაშვილის მიმართ აღკვეთის ღონისძიების სახით არანაირი ფორმა არ უნდა იყოს გამოყენებული, თუმცა ალტერნატივის სახით სასამართლოს 2 000 - ლარიანი გირაო შესთავაზა, რაც მოსამართლემ არ გაიზიარა.