ჩეჩნეთის პრეზიდენტთან, რამზან კადიროვთან, დაახლოებულ მუსა ხანგოშვილს იზოლატორში ბრალი ოფიციალურად წარედგინა. მას პოლიციელის მიმართ ძალადობაში ადანაშაულებენ, რაც ჯარიმას ან 5 წლამდე პატიმრობას ითვალისწინებს.

ბრალის წარდგენის შემდეგ, იგი წინასწარი დაკავების იზოლატორიდან ყვარლის რაიონულ საავადმყოფოში გადაიყვანეს. ჯანმრთელობის პრობლემები ხანგოშვილს დიაბეტის გამო შეექმნა.

დაკავებული ბრალს არ აღიარებს. მისთვის აღკვეთის ღონისძიების შეფარდებაზე გურჯაანის სასამართლო ხვალ იმსჯელებს.

ყვარლის იზოლატორთან იმყოფებოდნენ ხანგოშვილის ოჯახის წევრებიც. მუსა ხარგოშვილის დედა მისი შვილის ჩეჩნეთის პრეზიდენტთან მეგობრობას არ უარყოფს და ამბობს, რომ ამაში პრობლემას ვერ ხედავს.