"კორტების საქმეზე" მსჯავრდებული ყოფილი სამართალდამცველების საქმე სტრასბურგში მიდის

სამართალი - 17:30, 28 Jul, 2018

2399

ე.წ. "კორტების საქმეზე" მსჯავრდებული ყოფილი სამართალდამცველების საქმეს სტრასბურგის სასამართლო განხილავს. ყოფილი პოლიციელების ინტერესების დამცველი აცხადებს, რომ ირაკლი ფირცხალავასა და გიორგი ცააძის მიმართ ადგილი ჰქონდა ადამიანის უფლებების მთელ რიგ დარღვევებს და ხელისუფლების სამივე შტოს წარმომადგენლები ღიად ცდილობდნენ ამ საქმეზე მართლმსაჯულება ხარვეზიანად განხორციელებულიყო:

„ე.წ კორტების საქმის შესწავლის შემდეგ დავრწმუნდი, რომ ირაკლი ფირცხალავასა და გიორგი ცააძის მიმართ ადგილი ქონდა, ადამიანის უფლებათა დარღვევის მთელ რიგ დარღვევებს, ხელისუფლების სამივე შტოს წარმომადგენლები ცდას არ აკლებდნენ, ღიად თუ ფარულად, რომ ამ საქმეზე მართლმსაჯულება ხარვეზიანად განხორციელებულიყო. ირაკლი ფირცხალავა ახსნა-განმარტების გარეშე ე.წ. მატროსოვის ციხიდან გლდანის მერვე დაწესებულებაში გადაიყვანეს, სადაც ადგილი ჰქონდა არადამიანურ მოპყრობას.“- განაცხადა ჯაბა კოჭლამაზაშვილმა.

გიორგი ცააძის დის ირინა ცააძის თქმით, ამ საქმით დაინტერესებულია პირადად თეა წულუკიანი:

„ქალბატონმა წულუკიანმა მართლმსაჯულებას ევთანაზია გაუკეთა და დაასამარა. ამ საქმით მოანგრია სასამართლო სისტემა, რაც კი დარღვევა არსებობს, ყველაფერი გამოიყენეს ამ საქმეში“- განაცხადა ირინა ცააძემ.

ირაკლი ფირცხალავას მეუღლის ნინო ხვიტიას თქმით, ირაკლი ფირცხალავასა და გიორგი ცააძის მიმართ სამართლიანი სასამართლო არ განხორციელებულა:

„არ მგონია რომ ამ შემთხვევის ანალოგი მოიძებნებოდეს, რაც ეხება მაღალჩინოსანი პოლიციელების მიერ სპეცოპერაციის განხორციელების გამო, მათ გასამართლებას განზრახ მკვლელობის მუხლით. ირაკლი ფირცხალავასა და გიორგი ცააძის მიმართ სამართლიანი სასამართლო არ განხორციელებულა და ისინი გასამართლებულნი არიან დაუმტკიცებელი მტკიცებულებებით."- განაცხადა ნინო ხვიტიამ.