მოზარდების მკვლელობა ხორავას ქუჩაზე - პარლამენტის დროებითი საგამოძიებო კომისიის ფარგლებში კომისიის წევრების კითხვებს თბილისის პროკურორის მოადგილე პასუხობს. მამუკა ვასაძის განცხადებით, ხორავას ქუჩაზე არასრულწლოვანთა მკვლელობის საქმეზე მაკრატლის თემით სპეკულირება ხდებოდა.

„კითხვები შეეხებოდა ფარდულს, დანის გაღუნვისა და მაკრატლის თემას, რომელზეც ექსპერტები სხვადასხვა ვერსიას გამოთქვამდნენ, აგრეთვე ექსპერტიზის დასკვნას, ჭრილობებს. მედიაში გავრცელდება ინფორმაცია, თითქოს ფარდული საგამოძიებო დანაყოფებმა დაანგრიეს. მოვისმინე პასუხი, რომ ამასთან არანაირი შემხებლობა არ ჰქონიათ და პროცესუალურადაც, შემთხვევის ადგილის დაცვის ვალდებულება არის შემთხვევის ადგილის დათვალიერების დასრულებამდე, ეს პასუხი გავეცი საზოგადოებას. მოვისმინე დანის გაღუნვასთან დაკავშირებით ინფორმაცია. ეს იყო საექსპერტო კვლევის მეთოდიკის შესაბამისად და არ იყო ვიღაცის ხელოვნურად მტკიცებულების ფალსიფიკაციისთვის განხორციელებული. ამასაც ამ ფორმით გავეცი პასუხი. მაკრატელთან დაკავშირებული ინფორმაცია ჩემთვისაც აღმოჩენა იყო. მედიით ვრცელდებოდა ინფორმაცია, თითქოს მაკრატლით მოხდა დაჭრა. ხდებოდა ამ თემით სპეკულირება საზოგადოებაში. ბუნებრივია, მოვისმინე, რომ მაკრატელი იყო შემთხვევის ადგილზე აღმოჩენილი. დაკითხული იყო ამასთან დაკავშირებით პირველადი სამედიცინო დახმარების ბრიგადის წევრები, რომლებსაც ეკუთვნოდათ ეს მაკრატელი და ესეც დადასტურებული იყო“, – აღნიშნა ვასაძემ.