მონაწილეობდა თუ არა მიხეილ კალანდია სარალიძის მკვლელობაში? - საგამოძიებო კომისია პროკურატურის წარმომადგენლებს კითხავს

სამართალი - 12:12, 23 Jul, 2018

1569

საპარლამენტო საგამოძიებო კომისიის სხდომაზე პროკურატურის წარმომადგენლების გამოკითხვა მიმდინარეობს.
სხდომა უკვე 2 საათია, გრძელდება. დეპუტატების ძირითადი შეკითხვები უშუალოდ გამოძიების მიმდინარეობას ეხება.

დეპუტატები დაინტერესდნენ როდის გადაწყვიტეს საგამოძიებო ორგანოში, დავით სარალიძის მკვლელობისთვის ბრალი წაეყენებინათ ერთ-ერთი არასდრულწლოვნისთვის.

ოთარ კახიძის განცხადებით, საქმის მასალებში არსებობს მტკიცებულებები, რომლითაც დავით სარალიძის მკვლელობის საქმეში მიხეილ კალანდიას თანამონაწილეობა დასტურდება.

თბილისის ყოფილი პროკურორმა, მიხეილ შაყულაშვილმა განაცხადა, რომ გ.ბ-ის მიმართ სარალიძის მკვლელობის ნაწილში ჰქონდათ ერთ-ერთი მოწმის პირდაპირი ჩვენება.

„გ.ბ-ს მიმართ სარალიძის მკვლელობის ნაწილში იყო მოწმე მ.კ-ს პირდაპირი ჩვენება, დანაზე და ხელსახოცზე, რომელშიც ეს დანა იყო გახვეული ამოსული გ.ბ-ს და სარალიძის დნმ კვლები. დადუნაშვილის და სარალიძის სასამართლო სამედიცინო ექსპერტიზები, რომელშიც აღწერილი ჭრილობების განლაგება თანხვედრაში იყო ჩვენებებთან, მოწმე ლუკას კალანდიას ჩვენება. გ.ბ.-ს მიმართ არსებული ფარული ჩანაწერი ფარდულში ჰყოფნის ნაწილში, ასევე, თუ არ ვცდები ა.დ.-ს ფარული ჩანაწერი იყო ტაქსში მონაყოლის ნაწილში,“ - განაცხადა მიხეილ შაყულაშვილმა.

გიგა ბოკერია დაინტერესდა, თუ საქმეში არსებობდა ფარული ჩანაწერი, რომელშიც არასრულწლოვანი დადუნაშვილის მკვლელობას აღიარებს, რატომ იყენებდა პროკურატურა ამ ფარულ ჩანაწერს სარალიძის მკვლელობის ნაწილშიც.

„ანუ ეს ფარული ჩანაწერი, რომელიც, პრინციპში, საკვანძო მტკიცებულებაა ამ პირის მიმართ, სადაც ის დადუნაშვილის მკვლელობას აღიარებს, ამ ფარულ ჩანაწერს, სადაც ის სარალიძეზე არაფერს არ იძახის, როგორ იყენებთ სარალიძის მკვლელობაში ბრალდებისთვის. თუ ეს ჩანაწერი არის ნამდვილი მტკიცებულება თქვენთვის და მოსამართლესთან მიგაქვთ და იმ სტანდარტით ხელმძღვანელობთ, რაზეც ბატონი ოთარი გესაუბრათ, აქ კაცი იძახის დანა დაარტყაო და სარალიძის ნაწილში აღწერს ყველაფერს და პირიქით, აღწერს ყველაფერს, როგორ არ ყოფილა ფიზიკურ შეხებაში,“ - განაცხადა გიგა ბოკერიამ.

თბილისის პროკურორის ყოფილი მოადგილე, გიორგი გაბოძე აცხადებს, რომ გ.ჯ.-ს და გ.ბ-ს ბრალი რომ წაუყენეს, მალევე გახდა ცნობილი, რომ გარკვეული გარემოებები სხვაგვარად იყო.