ტრაგედია ტყიბულში - შახტის ადმინისტრაციის პასუხისმგებელი პირები გამოკითხვაზე იმყოფებიან

სამართალი - 13:36, 16 Jul, 2018

1627

ტყიბულის მინდელის სახელობის შახტის ადმინისტრაციის პასუხისმგებელი პირები გამოკითხვაზე იმყოფებიან.

ამის შესახებ, იმერეთის, რაჭა-ლეჩხუმის და ქვემო სვანეთის პოლიციის დეპარტამენტის დირექტორის ბესიკ ამირანაშვილმა განაცხადა.

"ამ დროისთვის მიმდინარეობს ინტენსიური საგამოძიებო მოქმედებები. ადმინისტრაციის ყველა პასუხისმგებელი პირი გამოკითხვაზე გადაყვანილია პოლიციის განყოფილებაში" - აღნიშნა ამირანაშვილმა.

შემთხვევა ტყიბულში დღეს დილით მოხდა. მინდელის სახელობის შახტში 4 მეშახტე დაიღუპა, 6 კი დაშავდა, რომელთა მდგომარეობა მძიმეა. სავარაუდოდ, ტრაგედიის მიზეზი მეთანის დაგროვება გახდა, რომელმაც აფეთქება გამოიწვია.

კომპანია საქნახშირის უსაფრთხოების უფროსის თქმით, შახტში უსაფრთხოების ნორმები დაცული იყო.

შახტი წინა 5 აპრილის შემთხვევის გამო დალუქული იყო და გუშინ გაიხსნა.

იმერეთის, რაჭა-ლეჩხუმის და ქვემო სვანეთის პოლიციის დეპარტამენტის დირექტორის ბესიკ ამირანაშვილის ინფორმაციით, გამოძიების დასრულებამდე ტყიბულში არსებული 25-ვე შახტი დაილუქება.

შინაგან საქმეთა სამინისტრომ მომხდარ ფაქტთან დაკავშირებით, გამოძიება საქართველოს სისხლის სამართლის კოდექსის 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს.