მკვლელობა ხადას ხეობაში - 19 წლის მწყემს ბრალს დღეს წაუყენებენ

სამართალი - 11:19, 10 Jul, 2018

1460

ხადას ხეობაში ამერიკელი ცოლ-ქმარისა და მათი მცირეწლოვანი შვილის მკვლელობაში ბრალდებულ 19 წლის მწყემსს ბრალს სავარაუდოდ დღეს წაუყენებენ.

ადვოკატის მურმან ნიკოლეიშვილის თქმით, მისი დაცვის ქვეშ მყოფს ოფიციალური ვერსიისგან განხვავებული პოზიცია აქვს.

"ჩემი დაცვის ქვეშ მყოფს ოფიციალური ვერსიისგან განსხვავებული პოზიცია აქვს. ბრალს როდის წაუყენებენ, ეს პროკურატურის გადასაწყვეტია. საქმის მასალებიც მას შემდეგ გადმოგვეცემა სრულად, როდესაც ბრალს წაუყენებენ. თუმცა, ზოგადად, გავეცანით საქმის მასალებს და ამ ეტაპზე, გარკვეულ ინფორმაციას ვფლობთ. დეტალებზე ვერ გესაუბრებით, ჩემი დაცვის ქვეშ მყოფს სურს ასე" - აღნიშნა ადვოკატმა.

შინაგან საქმეთა სამინისტროს მცხეთა-მთიანეთის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, დამამძიმებელ გარემოებაში ჩადენილი, ორი ან მეტი პირის, მათ შორის, დამნაშავისათვის წინასწარი შეცნობით არასრულწლოვნის განზრახ მკვლელობის ბრალდებით, 1998 წელს დაბადებული მ.კ. დააკავეს. მკვლელობაში ბრალდებულ პირს უვადო პატიმრობა ემუქრება.

უწყების ინფორმაციით, მიმდინარე წლის 6 ივლისს "112"-ში შევიდა შეტყობინება საქართველოსა და ამერიკის ორმაგი მოქალაქეობის მქონე 2 პირის და მათი 4 წლის შვილის დაკარგვის შესახებ.

შეტყობინების ინიციატორის თქმით, დაკარგულები დუშეთის რაიონში, ხადას ხეობაში იმყოფებოდნენ და მათთან დაკავშირება ვერ ხერხდებოდა.

პოლიციელებმა და მაშველებმა დაუყოვნებლივ დაიწყეს სამძებრო სამუშაოები და შეტყობინებაში მითითებული ადგილები დაათვალიერეს. სამართალდამცველებმა სოფელ წკერეში დაკარგულების კუთვნილი ავტომანქანა და პირადი ნივთები აღმოაჩინეს.

იმავე დღეს, სამართალდამცველების და საგანგებო სიტუაციების მართვის სააგენტოს მაშველების ინტენსიური სამძებრო სამუშაოების შედეგად, 1976 წელს დაბადებული ლ.ს. ხევში, ჩანჩქერის პირას, გარდაცვლილი იპოვეს, რომელსაც პირველადი დათვალიერების შედეგად ძალადობის კვალი არ აღენიშნებოდა. ხოლო, შემდგომი სამძებრო სამუშაოების შედეგად, 7 ივლისს, ხევში მდებარე ჩანჩქერის მიმდებარე ტერიტორიაზე 1975 წელს დაბადებული რ.ს.-ს ცხედარი აღმოაჩინეს.

თავდაპირველად გამოძიება სისხლის სამართლის კოდექსის 116-ე მუხლის მე-2 ნაწილით დაიწყო, რაც გაუფრთხილებლობით სიცოცხლის მოსპობას გულისხმობს. სამედიცინო ექსპერტიზის პირველადი მონაცემების მიღების შემდეგ საქმე განზრახ მკვლელობის მუხლით გადაკვალიფიცირდა.

გატარებული სამძებრო და საგამოძიებო ღონისძიებების შედეგად, სამართალდამცველებმა მკვლელობაში ბრალდებული 1998 წელს დაბადებული პირი დააკავეს, რომელმაც აღიარა ჩადენილი დანაშაული.