"ამბობს, რომ ჩხუბში დაახლოებით 20-25 ადამიანი მონაწილეობდა, თუმცა მკვლელობაზე არ საუბრობს"- რა უთხრა კომისიას მოზარდების მკვლელობის თვითმხილველმა

სამართალი - 12:48, 28 Jun, 2018

1713

ხორავას ქუჩაზე მომხდარი მოზარდების მკვლელობის მოწმე ნიკოლოზ იორდანიშვილი ამბობს, რომ ჩხუბში დაახლოებით 20-25 ადამიანი მონაწილეობდა.

საქმის დროებითი საგამოძიებო კომისიის თავმჯდომარე, სერგი კაპანაძე აქვე აღნიშნავს, რომ მოწმე დეტალებზე არ საუბრობს და ამბობს, რომ არ ახსოვს.

„ორივე დანაშაულის ადგილიდან ის დაახლოებით 3-4 მეტრში იმყოფებოდა. აქედან გამომდინარე ამ შემთხვევაში ვერ დანახვა უფრო რთულია ვიდრე დანახვა. ის ამბობს, რომ არ ახსოვს, დეტალებზე არ საუბრობს. თუმცა რაღაც დეტალებზე საბოლოო ჯამში მაინც ისაუბრა. არ კონკრეტულად მკვლელობის, არამედ ჩხუბის. ის ამბობს, რომ ჩხუბში დაახლოებით 20-25 ადამიანი მონაწილეობდა. ეს არის მოწმე, რომელიც მანქანაში იჯდა და ყველაფერს ხედავდა, რაც მისი მანქანის წინ ხდებოდა. მან ახლა ჩვენ ჩვენება შემთხვევის ადგილზე მოგვცა. ჩვენების მიცემა კომისიის გაფართოებული შემადგენლობის წინაშე სავარაუდოდ კიდევ მოუწევს.

გულწრფელად გეტყვით, ჩემი შთაბეჭდილება არის, რომ შეუძლებელია ადამიანს, რომლის წინაც ხდება ასეთი დანაშაული, ეს არ დაენახა. თუმცა ის დეტალებზე არ საუბრობს, არ ახსოვს. რაც შეეხება იმას, თუ რატომ არ საუბრობს ამასთან დაკავშირებით, ჩვენი დასკვნები გვექნება.

ახლა წინასწარ თქმისგან თავს შევიკავებ. ამისთვის შეიძლება ბევრი მიზეზი არსებობდეს. მაგრამ ფაქტი ერთია, როდესაც ასეთი რაღაც ადამიანის წინ ხდება, ცოტა არ იყოს დაუჯერებელია, რომ ვერაფერს იხსენებს და ვერ ხედავს. ჩვენ ამ თემას კომისიის საქმიანობის ფარგლებში კიდევ აუცილებლად დავუბრუნდებით და უფრო მეტ ინფორმაციასაც მოგაწვდით. ახლა სხვა მოწმეების დაკითხვასაც ვაგრძელებთ და ამის შესახებაც ინფორმაცია ხელმისაწვდომი იქნება”,- განაცხადა კაპანაძემ.