რატომ არ გაიჩხრიკა ხორავას ქუჩაზე მომხდარი მკვლელობის საქმის მონაწილე ყველა პირის სახლი "მაშინ მთელი 51-ე სკოლა და მთელი ქუჩა, უნდა გაჩხრეკილიყო"

სამართალი - 18:01, 26 Jun, 2018

1753

მოზარდების მკვლელობის საქმის საგამოძიებო კომისიის წევრი, ირაკლი აბესაძე დაინტერესდა, თუ რატომ არ გაიჩხრიკა ხორავას ქუჩაზე მომხდარი მკვლელობის საქმის მონაწილე ყველა პირის სახლი.

„ყველა ფიგურანტი პირის მიმართ, ვსაუბრობ მინიმუმ 20 პირზე, რომელიც სახელობითად იყო ეზოში და ჩხუბში მონაწილეობდა, ჩხრეკა ჩატარებული გაქვთ მხოლოდ და მხოლოდ 5 სახლში, მსჯავრდებულების გ.ჯ და გ.ბ. , დ.ღ, თ.ნ, და დ. ნ . სახლებში. დანარჩენი 15 ადამიანის სახლში საერთოდ ჩხრეკა არ გაქვთ ჩატარებული, რომ მათი მაგალითად კომპიუტერული ტექნიკა ამოგეღოთ, სადაც ასევე შესაძლებელია სოციალური ქსელებით არსებული მიმოწერის შესახებ მიგეღოთ ინფორმაცია,“ - განაცხადა ირაკლ იაბესაძემ.

შს სამინისტროს წარმომადგენელმა კი თქვა, რომ იაბესაძის კითხვა „გლობალურია“.

„მე მესმის თქვენი კითხვა. თქვენ ძალიან გლობალურად საუბრობთ. ასეთი ლოგიკით მაშინ ყველა უნდა გაჩხრეკილიყო, მთელი 51-ე სკოლა და მთელი ხორავას ქუჩა. თუ რამე ინფორმაცია არსებობდა, გამომძიებელმა მიიღო შესაბამისი გადაწყვეტილება და ჩაატარა საგამოძიებო მოქმედებები,“ - განაცხადა კახა სირაძემ.