გამომძიებელი კახაბერ სირაძე ადასტურებს, რომ ადგილი, სადაც ხორავას ქუჩაზე მომხდარი მკვლელობის საქმეში მონაწილე არასრულწლოვნებმა თავი მოიწესრიგეს, სამართალდამცველებს ოფიციალურად არ დაუთვალიერებიათ.

საუბარია პეტრიაშვილის ქუჩის მიმდებარედ არსებულ ადგილზე, სადაც ექვსმა პიროვნებამ თავი მოიწესრიგა.

“ზოგი სისხლიანი იყო და მოიწესრიგეს რა თავი, ეხლა არ უბანავია... თავის დაბანა და დუშის მიღება არ ყოფილა. მოწესრიგდნენ, რა საშუალებასაც აძლევდათ, გაიწმინდეს...“- თქვა გამომძიებელმა.

ამის შემდეგ ოთარ კახიძე დაინტერესდა გაუშვეს თუ არა გამომძიებლები, დაათვალიერეს თუ არა ე.წ დამატებითი შემთხვევის ადგილი, სადაც შეიძლებოდა ყოფილიყო სისხლის კვლები, სადაც შეიძლება დამალული ყოფილიყო მკვლელობის იარაღი, ან სხვა ღონისძიებები გატარებულიყო.

ოთარ კახიძე დაინტერესდა, გ.ბ-ს ჩვენების მიხედვით, გარეცხა თუ არა თავისი სისხლიანი დანა იმ ონკანზე.

გამომძიებელმა კი დაადასტურა, რომ ადგილზე ჯგუფი იყო გასული, თუმცა დათვალიერების ოქმი არ შედგა.

“იქაც რაღაცა რომ ყოფილიყო, კვალი რაღაცა, მიიღებდნენ გადაწყვეტილებას გამომძიებლები”- თქვა სირაძემ.