"ორსულ გოგოს, ქურთუკი ზედ შემოახიეს და ცემა დაუწყეს, შარვალზე სიგარეტის ნამწვავები ეტყობა"- პაპიძემ პოლიციელებს სტრასბურგში უჩივლა

სამართალი - 13:42, 07 Jun, 2018

2954

ქმრისა და მცირეწლოვანი შვილის მკვლელობაში მსჯავრდებული მაგდა პაპიძემ ადამიანის უფლებათა დაცვის ევროპულ სასამართლოს მიმართა.

ახალგაზრდა ქალის ინტერესებს ადამიანის უფლებათა ცენტრი იცავს. საჩივარში პაპიძე დეტალურად აღწერს იმ პოლიციელებს, რომლებმაც მასზე იძალადეს.

აღნიშნულ საქმეზე ადამიანის უფლებათა ცენტრმა განცხადება გუშინ გაავრცელა.

„ნიუპოსტი“ მსჯავრდებულ მაგდა პაპიძის დას ესაუბრა. ლანა პაპიძე ამბობს, რომ "თუ სტრასბურგის სასამართლომ საჩივარი დააკმაყოფილა, გამოძიება ახლიდან დაიწყება და ყველა, ვინც ორსული მაგდა უმოწყალოდ სცემა სიხლის სამართლის პასუხისგებაში მიეცემა“.

„ველოდებით დადებით პასუხს, ჩემი და ნაწამებია. ჩემი და საჩივარში დეტალურად აღწერს იმ პოლიციელებს, რომლებმაც მასზე იძალადეს. საუბარია დიღმის პოლიციელებზე, ამ ადამიანებმა ორსულ გოგოს, განყოფილებაში მიყვანისთანავე ტანსაცმელი გახადეს და ცემა დაუწყეს“- აცხადებს ლანა პაპიძე.

მისი თქმით, საჩივრის განხილვა ჯერ არ დაწყებულა, რადგან გარკვეული პროცედურებია გასავლელი.

„თუ საქმეზე დადებითი პასუხი მოვიდა, რა თქმა უნდა, ხელახალი გამოძიება დაიწყება. მისი დახეული ქურთუკი დღესაც ჩემთან ინახება, აბსოლუტურად ზედ არის შემოხეული, ასევე შარვალზე აშკარად ეტყობოდა სიგარეტის ნამწვავები“- უთხრა „ნიუპოსტს“ პაპიძემ.

მისი თქმით, მაგდა პაპიძე ოჯახში თვეში რამდენჯერმე რეკავს და მისი პოზიცია უცვლელია, რომ „სასტიკი მკვლელობა მას არ ჩაუდენია“- დასძინა მსჯავრდებულის დამ.

ცნობისთვის, 2016 წლის 4 ივლისს, ნაფიც მსაჯულთა სასამართლომ მაგდა პაპიძე დამნაშავედ სცნო ქმრისა და შვილის მკვლელობაში (დანაშაული გათვალისწინებული საქართველოს სისხლის სამართლის კოდექსის 109-ე მუხლით). 2016 წლის 6 ივლისს, თბილისის საქალაქო სასამართლომ მას უვადო თავისუფლების აღკვეთა მიუსაჯა.