მოზარდების მკვლელობის საქმე - დღეს თბილისის საქალაქო სასამართლომ ორ არასრულწლოვანს განაჩენი გამოუტანა, ერთი ბრალდებული დამნაშავედ იქნა ცნობილი ლევან დადუნაშვილის მკვლელობის ეპიზოდში და გამართლდა დავით სარალიძის მკვლელობის ეპიზოდში, მეორე ბრალდებული გამართლდა დადუნაშვილის ეპიზოდში და გამტყუნდა სარალიძის ეპიზოდში, თუმცა, გადაკვალიფიცირდა მუხლი და მას განაჩენი განზრახ მკვლელობის მცდელობის მუხლით გამოუტანეს.

სასამართლოს განაჩენს და გადაწყვეტილებას ბუნდოვანს უწოდებს საქმის პროკურორი მარიკა გოგოხია. მისი განცხადებით ბრალდება განაჩენს სააპელაციო სასამართლოში გაასაჩივრებს:

„საქმეში არსებობდა მტკიცებულებები იმისა, რომ მხოლოდდამხოლოდ ორი ბრალდებული იღებდა მკვლელობაში უშუალო მონაწილეობას, რომლებსაც წარედგინათ შესაბამისად ბრალდება, 109-ე მუხლით რაც არის გათვალისწინებული, შესაბამისად ჩვენ გვქონდა ყველა უტყუარი მტკიცებულება, რომელიც ადასტურებდა აღნიშნულ ბრალდებას. კიდევ ერთხელ მინდა ხაზი გავუსვა, რომ სასამართლოს გადაწყვეტილება არის ჩვენთვის გაურკვეველი, ბუნდოვანი და მას შემდეგ,რ აც სასამართლო მოგვაწოდებს ჩვენ განაჩენის სრულ ვერსიას, მისი დასაბუთების შესაბამისად, გახდება ჩვენთვის ცნობილი იმ მტკიცებულებებზე რა იმსჯელა მოსამართლემ, რომელი გაიზიარა და რომელი არ გაიზიარა. თუმცა, მიუხედავად ამისა, რაც არ უნდა ეწეროს სასამართლოს განაჩენში, ჩვენი პოზიცია, რომ ყველა მტკიცებულება მიუთითებდა სწორედ იმ ბრალად შერაცხული დანაშაულებრივი ქმედებების ცადენაში, რომელიც ამ ორ არასრულწლოვანს ჰქონდა ბრალად წარდგენილი, შესაბამისად, ჩვენ ამ გადაწყვეტილებას გავასაჩივრებთ სააპელაციო სასამართლოში“, - განაცხადა მარიკა გოგოხიამ.