ხორავას ქუჩის საქმეზე სასამართლო დასასრულს უახლოვდება - მოსამართლე სავარაუდოდ დღეს განაჩენის გამოსატანად გავა

სამართალი - 09:39, 29 May, 2018

1803

ხორავას ქუჩაზე მომხდარი მკვლელობის საქმეზე სასამართლო პროცესი დასასრულს უახლოვდება. დღეს ბრალდებისა და დაცვის მხარეები დასკვნითი სიტყვას წარმოთქვამენ. საბოლოო სიტყვით სასამართლოს წინაშე ბრალდებულებიც წარდგებიან.

პროცესი თბილისის საქალაქო სასამართლოში 11:30 საათზეა ჩანიშნული.

საქმის პროკურორის განცხადებით, დასკვნით სიტყვაში პროკურატურა ყურადღებას გაამახვილებს ყველა იმ მტკიცებულებაზე, რაც მათ საქმის არსებითი განხილვის ფარგლებში გამოიკვლიეს. პროკურატურა ამტკიცებს, რომ ორმა არასრულწლოვანმა ჯგუფურად ჩაიდინა მკვლელობა, ერთმა ერთი მოზარდის, ხოლო მეორე არასრულწლოვანმა – ორის.

დაცვის მხარეს მიაჩნია, რომ ბრალდების მტკიცებულებები არ ასახავს რეალობას და მოსამართლის გადაწყვეტილება მათ მიერ წარდგენილ მტკიცებულებებს უნდა დაეფუძნოს.

„დარწმუნებული ვარ სასამართლო მტკიცებულებების გაანალიზების შედეგად აუცილებლად მივა იმ დასკვნამდე, რომ ბრალდების მხარის პოზიცია საერთოდ აცდენილია ჭეშმარიტებას, ხოლო დაცვის მხარის პოზიცია არის დამაჯერებელი, უტყუარი, რომელიც უნდა გაიზიაროს. ბრალდებულმა მისცა უკიდურესად დამაჯერებელი ჩვენება, ბრალდებულმა აბსოლუტურად ყველა შეკითხვას დამაჯერებელი პასუხი გასცა, ისაუბრა იმ დეტალებთან დაკავშირებით, რომელზეც არც ერთ მოწმეს ნასაუბრები არ ჰქონდა და ბრალდებული ჩვენებაში ეჭვის შეტანის საფუძველი საერთოდ არ არსებობს,“-აცხადებს ადვოკატი ირაკლი კაკაბაძე.