"ინა გუგუშვილი დამემუქრა თმების დაგლეჯით... პროკურორებს ნამდვილად ჰქონდათ დანა და მაკრატელი"- ადვოკატი

სამართალი - 18:18, 28 May, 2018

3900

ხორავას ქუჩაზე მოზარდების მკვლელობის საქმეზე ერთ-ერთი ბრალდებულის ადვოკატი ინგა შარაშენიძე სკანდალურ განცხადებას აკეთებს.

ადვოკატი აღნიშნავს, რომ პროკურორმა ინა გუგუშვილი 26 მაისის პროცესამდე „თმების დაგლეჯით დაემუქრა“.

"მედიით შაბათის ინციდენტის მხოლოდ ნაწილი გავიდა. მას წინ უძღოდა ბევრად დიდი ინციდენტი, რომელიც გადაღებული არაა და ეს პირველი შემთხვევა არაა. გამოკითხვაზე როდესაც დამიბარებენ აუცილებლად დავადასტურებ, რომ ერთ-ერთ პროკურორთან პირადად მე მქონდა მანამდე ინციდენტი. მას ხასიათში აქვს, რომ ადამიანებს ემუქრება, შეურაცხყოფას აყენებს. მე მქონდა სხვა შემთხვევა, როდესაც ქალბატონი ინა გუგუშვილი დამემუქრა თმების დაგლეჯით ამავე საქმეზე შესვენებაზე როცა ვიყავით გამოსულები. მე და ქალბატონი ინა ვიყავით, როცა მე ვიხუმრე არა მასზე, არამედ სრულიად სხვა ადამიანზე და მისი რეაქცია იყო, რომ თუ მოვიდოდა, საერთოდ თმებს დამაგლეჯდა.

ამასთან, პროკურორებს შაბათს ნამდვილად ჰქონდათ დანა და მაკრატელი. ისინი თითქოს იყვნენ ექსპერტები და სურდათ ჩაეტარებინათ საგამოძიებო ექსპერიმენტი. წარმოადგინეს ტანსაცმელების ნაჭრები და სასამართლოსთვის უნდოდათ ეჩვენებინათ, რომ ეს საგანი ისეთ დაზიანებას არ აყენებდა რამეს, რაზეც ექსპერტიზის დასკვნაში იყო საუბარი. ამაზე მე გამოვთქვი პროტესტი, ვინაიდან ამ ექსპერიმენტით ისინი საკუთარ მტკიცებულებებთან წინააღმდეგობაში მოდიოდნენ", - განაცხადა შარაშენიძემ.