შესაძლო ზეწოლა და მუქარა დამოუკიდებელ სასამართლო ექსპერტზე - პროკურორისთვის უცნობია, მიმდინარეობს თუ არა გენერალურ ინსპექციაში მის მიმართ მოკვლევა

სამართალი - 16:28, 28 May, 2018

1374

ხორავას ქუჩაზე, მოზარდების მკვლელობის საქმის პროკურორისთვის უცნობია, მიმდინარეობს თუ არა მთავარი პროკურატურის გენერალურ ინსპექციაში მის მიმართ მოკვლევა.

ზვიად ფხაკაძე არ გამორიცხავს, რომ დაკითხვაზე უახლოეს დღეებში დაიბარონ.

„ჩემთვის არ არის ცნობილი, დაიწყო თუ არა გენინსპექციამ მოკვლევა, არის შემთხვევა, როდესაც გენინსპექცია იწყებს მოკვლევას, მაგრამ იმ პირის მიმართ, ვის მიმართაც მოკვლევა არის დაწყებული შეიძლება, არ იცოდეს ეს. მე დღესდღეობით გიდასტურებთ, რომ არ ვყოფილვარ დაბარებული დაკითხვაზე, შესაძლებელია დღეს ან ხვალ დამიბარონ. მოგეხსენებათ მთელი დღის განმავლობაში პროცესებზე ვარ და არ ვიცი, შესაძლებელია ეგ იყოს შემაფერხებელი გარემოება. ეს არის ჩემთვის შეურაცხმყოფელი, მით უფრო რომ ქალის მიმართ თითქოს მე საცემრად გავიწიე. ეს კითხვაც და ამ განცხადების გავრცელებაც არის ჩემთვის შეურაცხმყოფელი,“ - განაცხადა ზვიად ფხაკაძემ.

როგორც დღეს გაირკვა, ექსპერტ მაია ნიკოლეიშვილთან დაკავშირებით პროკურორების მხრიდან სავარაუდო გადაცდომის ფაქტზე მთავარი პროკურატურის გენერალურ ინსპექციაში სამსახურებრივი შემოწმება დაიწყო.

დამოუკიდებელი სასამართლო-სამედიცინო ექსპერტი მაია ნიკოლეიშვილი, რომელმაც ხორავას ქუჩაზე მოზარდების მკვლელობის საქმეზე ექსპერტიზა ჩაატარა, ამბობს, რომ პროკურორები გაღიზიანებული არიან დასკვნის შინაარსით და ამიტომ მის წინააღმდეგ საქმის აღძვრით იმუქრებიან.