მოზარდების მკვლელობა ხორავაზე - "მოწმე ისაუბრებს იმ ახალ დეტალებზე, რომლებზეც აქამდე არცერთს უსაუბრია"

სამართალი - 13:55, 28 May, 2018

1946

ხორავას ქუჩაზე მოზარდების მკვლელობის საქმეზე, დღეს სასამართლოს ჩვენებას ერთ-ერთი ბრალდებული მისცემს.

როგორც ადვოკატმა ტარიელ კაკაბაძემ ჟურნალისტებს უთხრა, მოწმე ისაუბრებს იმ ახალ დეტალებზე, რომელზე აქამდე არცერთ მოწმეს არ უსაუბრია.

"დეტალურად მიაწვდის სასამართლოს იმ ინფორმაციას, თუ რა მოვლენები განვითარდა ხორავას ქუჩიდან წამოსვლის შემდეგ და მისი გადამალვისას, ვინ დააორგანიზა ეს ყველაფერი და ა.შ.

დღევანდელ სხდომაზე დასრულდება ბრალდების მხარის მტკიცებულებების გამოკვლევა. დღეს დაიკითხება არასრულწლოვანი ბრალდებული, რომელიც ისაუბრებს იმასთან დაკავშირებით, თუ როგორ დაიწყო ხორავას ქუჩაზე კონფლიქტი, როგორ გაგრძელდა კონფლიქტი და ასევე ისაუბრებს სხვადასხვა პირებზე, რომლებიც ამა თუ იმ ფორმით იყვნენ ჩართულები კონფლიქტში. მიმაჩნია, რომ ბრალდებულის ჩვენება იქნება აბსოლუტურად დამაჯერებელი, დეტალური და სასამართლოს ექნება ყველანაირი საფუძველი იმისა, რათა გაიზიაროს ბრალდებულის მიერ სასამართლოში მიცემული ჩვენება.

გამორიცხული არაა დღეს ჩვენ მოვისმინოთ ბრალდების მხარის დასკვნითი სიტყვა, ხვალინდელ სხდომაზე კი უკვე დაცვის მხარე წარსდგება დასკვნითი სიტყვით, სადაც დაცვის მხარე დეტალურად მიმოვიხილავთ საქმეში არსებულ მტკიცებულებებს და დარწმუნებული ვართ, რომ წარმატებით შევძლებთ დავადასტუროთ, რომ ბრალდება სრულიად უსაფუძვლოა და საგამოძიებო ორგანომ არ გამოიძია აღნიშნული სისხლის სამართლის საქმე სწორად და ობიექტურად.

სასამართლო სხდომაზე გამოკვლეული იქნა ექსპერტიზის დასკვნა, ასევე დაკითხული იქნა ორი ექსპერტი. ორივემ კატეგორიულად დაადასტურა, რომ დავით სარალიძის დაჭრაში მონაწილეობდა სხვადასხვა იარაღი, მათ შორის დანები და სხვა იარაღები. საგამოძიებო ორგანო კი მიუხედავად უტყუარი მტკიცებულებებისა, რომელიც წარდგენილი იყო სასამართლოში, მაინც იმ აზრზე რჩება, რომ საქმეში არსებული ორი დანითაა მიყენებული ჭრილობები", - განაცხადა კაკაბაძემ.