„ბასიანი“ არის მძევალი- შსს-მ გუშინ კლუბის გახსნა გადაწყვიტა, მაგრამ 15 წუთში გადაიფიქრეს"- გელბახიანი დაკითხვაზე იმყოფება

სამართალი - 12:44, 22 May, 2018

1713

კლუბებში ჩატარებული სპეცოპერაციიდან 10 დღის შემდეგ კლუბ „ბასიანის“ ერთ-ერთი მეპატრონე დაკითხვაზე დაიბარეს, ზვიად გელბახიანი საგამოძიებო უწყებაში ცოტა ხნის წინ შევიდა. გელბახიანის თქმით, მისთვის უცნობია, კონკრეტულად რა თემებთან დაკავშირებით სურს გამოძიება მისგან ინფორმაციის მიღება, თუმცა ვარაუდობს, რომ ის შესაძლოა, ის მოწმის სახით იქნეს დაკითხული იმ რვა პირის საქმესთან დაკავშირებით, რომლებიც შსს-ს თანამშრომლებმა ნარკოტიკების რეალიზების ბრალდებით 12 მაისს დააკავეს. როგორც გელბახიანმა რუსთავი2-თან განაცხადა, შსს არაკოორდინირებულად მუშაობს და „ბასიანი“ ხელისუფლების მძევლად იქცა:

„გუშინ მოხდა საკმაოდ კომიკური ფაქტი, დაგვირეკეს, დაახლოებით 9 საათისკენ და გვითხრეს ხვალინდელ დღეზე, რომ კლუბი გაიხსნებოდა და მედიასთნ ერთად შეგვეძლებოდა, რომ შევსულიყავით. ბუნებრივია, ეს შევაფასებთ პოზიტიური ნაბიჯი შსს-სგან, მაგრამ 15 წუთში დაგვირეკეს და გვითხრეს, რომ კლუბის გახსნა გადაიდო და მე ვარ დაბარებული დაკითხვაზე. ეს ეჭვებს ბადეს, რომ ამ ყველაფერს აქვს პოლიტიკური სარჩული, ვინაიდან „ბასიანის“ გახსნასთან დაკავშირებით სხვადასხვა ვერსია ვრცელდება, ერთი მხრივ, შს მინისტრი აცხადებს, რომ უმოკლეს ვადაში, დაახლოებით, 4-5 დღეზე იყო საუბარი, კლუბი იქნება გახსნილი, თუმცა მოადგილეს სხვა ვერსიები აქვს, ის იძახის, რომ კლუბი 2-3 კვირაში გაიხსნება. „ბასიანი“ „თეთრი ხმაურის მოძრაობასთან“ ერთად აქტიურად არის ჩართული კამპანიაში, რომელიც ბევრ საკითხში ითხოვს ცვლილებებს. მე და ჩემს თანამებრძოლებს გვაქვს განცდა, რომ „ბასიანი“ არ იხსნება იმიტომ, რომ არის მძევალი, რამდენად გავაგრძელებთ ან არ გავაგრძელებთ აქციებს.“- განაცხადა გელბახიანმა.