"ნიუპოსტის" ინფორმაციით, დოდო გუგეშაშვილი მისი და შვილის ჩაცხრილვის შემკვეთზე გავიდა. მხედრიონის ყოფილი ლიდერი „ნიუპოსტთან“ მის მიერ, პირადი კონტაქტებით მოპოვებულ ინფორმაციაზე არ საუბრობს, თუმცა დადასტურებით აცხადებს, რომ 33 წლის ნოდარ გუგეშაშვილი დაქირავებულმა "ქილერმა" მოკლა. მისივე თქმით, „ეს იყო შეკვეთილი მკვლელობა, თუმცა მკვლელმა დავალება ბოლომდე ვერ შეასრულა“, რადგან დოდო გუგეშაშვილი გადარჩა.

თადარიგის პოლკოვნიკი შინაგან საქმეთა მინისტრთან შეხვედრას ითხოვს, მანამდე კი ახალი გარემოებებს პირადი კონტაქტებით აზუსტებს.

„სამი დღის წინ გავაკეთე განცხადება, რომ მე და ჩემს ადვოკატს რაღაცის დასადგენად 10 დღე გვჭირდება-თქო, ათდღიანი ვადა ჯერ არ ამოწურულა, ამ წუთებშიც ვცდილობთ გარკვეული დეტალების გარკვევას, რის შემდეგაც ვაპირებთ შს მინისტრთან შეხვედრას, იმედია არ მოხდება ისე, რომ მინისტრი არ შეგხვდება“- განაცხადა „ნიუპოსტთან“ გუგეშაშვილმა.

თადარიგის პოლკოვნიკის თქმით, მისი დაჭრისა და ნოდარ გუგეშაშვილის მკვლელობის საქმეზე გარკვეული, საინტერესო გარემოებები გამოიკვეთა.

„ამ გარემოებების დადგენას ახლა ვცდილობთ, სწორად გამიგეთ, დრო კიდევ მჭირდება. ეს იყო შეკვეთილი მკვლელობა და ამ მიმართულებით გვაქვს გარკვეული სიახლეები“- აღნიშნა გუგეშაშვილმა.

კითხვაზე, გავიდა თუ არა მკვლელობის შემკვეთზე ან შემსრულებელზე თადარიგის პოლკოვნიკი ამბობს, რომ „კონკრეტულ გვარებს ვერ დაასახელებს“.

„მჭეირდება რაღაცის დაზუსტება, კონკრეტული გვარი არ ვიცი ნამდვილად. მე მაქვს დასაბუთებული ეჭვი, რომ ჩემი ოჯახის მკვლელობა დაიგეგმა გარკვეული ჯგუფის მიერ, ის (მკვლელობაში ბრალდებული) უბრალოდ შემსრულებელია. არის კიდევ ერთი გარემოება, რომელიც ზუსტდება, თუმცა ეჭვგარეშეა, რომ ეს იყო შეკვეთილი მკვლელობა, მარტო სელფის გადაღება არ არის ამ ვარაუდის მოტივი, სხვა რამეა...“ - აღნიშნავს მოკლული გუგეშაშვილის დედა.

დოდო გუგეშაშვილი აღნიშნავს, რომ შს სამინისტროსგან ამ დრომდე არ მიუღია პასუხი, დატოვა თუ არა მკვლელობაში ბრალდებულმა ქვეყანა. მისივე განცხადებით, მან არაფერი იცის შემზარავი მკვლელობის მოტივთან დაკავშირებითაც.

„რაც გავარკვიე, ესეც ჩემი კონტაქტებით, თუ რა გამოიკვეთა ამაზე დაზუსტებით რამდენიმე დღეში ვისაუბრებ... ნამდვილად არ ვიცი, სად იმყოფება ჩემი ოჯახის მკვლელი, თუმცა როცა გაირკვევა და იმედი მაქვს ასე მოხდება... სიმართლე გითხრათ, ჩემთვის დიდი მნიშვნელობა არ აქვს მკვლელმა დატოვა თუ არა საქართველო, იმიტომ რომ ადამიანები ჯერ-ჯერობით უცხო პლანეტაზე არ ცხოვრობენ, ყველგან შეიძლება მიგნება. როცა გამოიკვეთებიან შემკვეთიც და შემსრულებლები, მათ აუციოლებლად ჩამოიყვანენ“- დასძინა დოდო გუგეშაშვილმა.

ამასთან, როგორც ინტერვიუს მსვლელობისას გაირკვა, დოდო გუგეშაშვილი საგამოძიებო ორგანოში დღეს 14:00 საათზე დაიბარეს.

მისი თქმით, საგამოძიებო უწყებიდან გამოსვლის შემდეგ ის უფრო მეტ დეტალს გაასაჯაროებს.