"გალერის" დაცვის სამსახურის უფროსის ადვოკატი ეჭვობს, რომ გაურკვეველი სახის ნივთიერება სამართალდამცველებმა დადეს

სამართალი - 13:29, 12 May, 2018

3289

კაფე გალერის უსაფრთხოების სამსახურის უფროსი ვიქტორ ჟამუტაშვილი, რომელიც გუშინ დააკავეს მისმა ადვოკატმა მოინახულა.

უფლებადამცველის თქმით, მის დაცვის ქვეშ მყოფს დაკავების დროს დაზიანებები აქვს მიღებული. როგორც ადვოკატმა ხათუნა ხურცილავამ წინასწარი დაკავების იზოლატორის დატოვების შემდეგ ჟურნალისტებს განუცხადა, დაკავების ოქმში წერია, რომ კაფე "გალერის" დაცვის სამსახურის უფროსს ვიქტორ ჟამუტაშვილს 50 აბი ექსტაზი აღმოუჩინეს.

„მთელი ღამის განმავლობაში მიდიოდა ჩხრეკა, მოხდა ამოღება რაღაც ნივთიერების, რომელიც ჯერჯერობით დაუდგენელია, რა ნივთიერებაა. არის დერეფანი, დერეფნიდან გადიხარ ეზოში, იმ დერეფანში სველი წერტილებია. მე, პირადად, რამდენჯერმე გავიარე იმ ადგილზე და რაიმე ნარკოტიკი არ იყო და დაახლოებით 40 წუთის შემდეგ, ერთ-ერთი თანამშრომელი მეუბნება, რომ რაღაც ნივთიერება არის იატაკზე, რომელზეც შეიძლება, სამჯერ გადამევლო და აუცილებლად მე იმას შევამჩნევდი.

საფუძვლიანი ეჭვი მაქვს და ამასთან დაკავშირებით მტკიცებულებებს შევაგროვებ, როგორც დაცვის მხარე. რაც შეეხება რაიმე ნივთიერება, ვინმე კონკრეტული გალერის თანამშრომლისგან არ ამოღებულა. უბრალოდ, იქ იყო ძალიან ბევრი სტუმარი. როგორც თანამშრომლები ამბობენ, იქ არსებული რამდენიმე ნარკოტიკი შეიძლება, სტუმარმაც კი დააგდო,“ - აცხადებს ხათუნა ხურცილავა.

უფლებადამცველის თქმით, ერთ-ერთი დაკავებულის სახლში ჩხრეკა ჩატარდა და სამართალდამცველებს კანონსაწინააღდმეგო რაიმე ნივთიერება არ ამოუღიათ.

„იყენებს დუმილის უფლებას ამ ეტაპზე, ბრალი არ წარუდგენიათ და ჩამოვყალიბდებით და სიმართლის თქმას ბევრი არ სჭირდება. ამბობენ, რომ მას ამოუღეს ნარკოტიკული ნივთიერება. მე საქმის მასალები არ გადმომცემია, რომ სრულყოფილად შევისწავლო მასალა და მოგაწოდოთ ინფორმაცია ამასთან დაკავშირებით. სახლში ჩატარდა ჩხრეკა და არანაირი კანონსაწინააღდმდეგო არ ამოუღიათ ნივთიერება. როგორც ვიცი, 21 მარტიდან მიდიოდა მიყურადება, თვალთვალი, ჩაწერა კაფე გალერიში,“ - განაცხადა ხათუნა ხურცილავამ.