ბიზნესმენ ნუგზარ კახიძის მკვლელობაში ბრალდებულს პატიმრობა შეეფარდა და მის მიმართ ძებნა გამოცხადდა

სამართალი - 15:15, 04 May, 2018

2144

ბიზნესმენ ნუგზარ კახიძის მკვლელობაში ბრალდებულს პატიმრობა შეეფარდა და მის მიმართ ძებნა გამოცხადდა - ინფორმაციას ამის შესახებ პროკურატურა ავრცელებს.

"2018 წლის 2 მაისს საქართველოს პროკურატურამ განზრახ მკვლელობის, სხვა დანაშაულის ჩადენის გაადვილების მიზნით დამამძიმებელ გარემოებებში განზრახ მკვლელობის მცდელობის და ცეცხლსასროლი იარაღისა და საბრძოლო მასალის მართლსაწინააღმდეგოდ შეძენის, შენახვისა და ტარების ფაქტზე გ.ჩ. ბრალდებულის სახით სისხლის სამართლის პასუხისგებაში მისცა საქართველოს სისხლის სამართლის კოდექსის 236-ე მუხლის მეორე და მესამე ნაწილებით, 108-ე მუხლითა და 19.109-ე მუხლის პირველი ნაწილის ,,დ” ქვეპუნქტით.

საქმეზე ჩატარებული გამოძიებით დადგინდა, რომ 2018 წლის 21 მარტს დაახლოებით 13:30 საათზე განზრახი დანაშაულისთვის სამჯერ ნასამართლევი, პირობითი მსჯავრის ქვეშ მყოფი გ.ჩ. მივიდა ქ, თბილისში ჭაბუა ამირეჯიბის ქუჩაზე მცხოვრებ ნ.კ.-სთან და განზრახ მოკვლის მიზნით, მაყუჩიანი „ბერეტას“ და „მაკაროვის“ სისტემის პისტოლეტებიდან ესროლა ნ.კ.-ს და ამავე ოჯახის დამხმარე ქალს - თ.ბ.-ს, რომელიც მისთვის ხელის შეშლას ცდილობდა, შემდეგ კი შემთხვევის ადგილიდან მიიმალა. მიღებული ჭრილობების შედეგად ნ.კ. ადგილზე გარდაიცვალა, ხოლო თ.ბ.-მ ჯანმრთელობის დაზიანება მიიღო.

2018 წლის 3 მაისს თბილისის საქალაქო სასამართლომ, ბრალდების მხარის შუამდგომლობის საფუძველზე მიმალვაში მყოფ გ.ჩ.-ს აღკვეთის ღონისძიების სახით პატიმრობა შეუფარდა და მის მიმართ გამოცხადდა ძებნა.

სისხლის სამართლის საქმეზე გრძელდება გამოძიება. გ.ჩ.-სთვის წარდგენილი ბრალდება სასჯელის სახედ და ზომად თერთმეტიდან თოთხმეტ წლამდე თავისუფლების აღკვეთას ითვალისწინებს" - აღნიშნულია პროკურატურის მიერ გავრცელებულ ინფორმაციაში.