"რატომ არ დაეხმარა, როცა ბავშვები ერთმანეთს ხოცავდნენ?! მოწმემ დაადასტურა, რომ წითელი "ჯიპის" პატრონმა ბავშვები მიატოვა და გაიქცა"

სამართალი - 11:22, 01 May, 2018

4803

თბილისში, ხორავას ქუჩაზე მოკლული დავით სარალიძის მამა, ზაზა სარალიძე აცხადებს, რომ სასამართლოს წინაშე დაკითხულმა მოწმემ „დაადასტურა, რომ წითელი "ჯიპის" პატრონმა ბავშვები მიატოვა და გაიქცა".

სარალიძე პროკურატურას უმოქმედობაში ადანაშაულებს და ამბობს, რომ მიუხედავად მოწმის განცხადებისა, ბრალდების მხარეს ამ გარემოებაზე ყურადღება არ გაუმახვილებია და რეაგირება არ მოუხდენია.

"ის ადამიანი უკვე დაკითხულია და ამბობს, არ შემიმჩნევია ჩხუბიო, მოწმემ კი დაადასტურა, რომ ის ყველაფერს ნათლად ხედავდა. ის ადამიანი იქ რომ იდგა, ლევანი დადუნაშვილი დაჭრილიც არ იყო, შეეძლო ხელი შეეშალა და ლევანიც არ მომკვდარიყო. შეიძლება ჩემს შვილს ფარდულში ვერ ხედავდა, მაგრამ ლევანს ნათლად ხედავდა, დანა როგორ დაარტყეს. ეს ადამიანი იმ შენობაში არსებულ ოფისში მძღოლად მუშაობს. ეს მეორე მოწმეა, რომელმაც შემთხვევის ადგილზე იმ "ჯიპის" ყოფნა დაადასტურა და პროკურატურის მხრიდან რატომ არ არის რეაგირება, ვერ ვხვდები.

ჩემთვის ძალიან საინტერესოა, რატომ არ დაეხმარა, როცა ბავშვები ერთმანეთს ხოცავდნენ. ყველაფერს შეხედა თავიდან ბოლომდე, იცის ვუნ დაარტყა დანა, მაგრამ ვიღაცის ეშინია. ეს ადამიანი როცა იკითხებოდა, იმდენად დაბნეული და შეშინებული იყო, თვალს თვალში ვერ მისწორებდა. მაშინვე შევატყვე რომ რაღაც იცოდა და მალავდა", - განაცხადა.