აფეთქება კრწანისში - შსს-მ ორი მოქალაქის დაშავების ფაქტთან დაკავშირებით გამოძიება დაიწყო

სამართალი - 10:37, 30 Apr, 2018

1913

მიმდინარე წლის 29 აპრილს გარდაბნის რაიონული სამმართველოს თელეთის განყოფილებაში შემოვიდა შეტყობინება, რომ გარდაბნის რაიონის სოფელ კრწანისში მდებარე, შინაგან საქმეთა სამინისტროს განსაკუთრებულ დავალებათა დეპარტამენტის, საბრძოლო მომზადების და გადამზადების სამმართველოს პოლიგონზე ორი მოქალაქე - 1994 წელს დაბადებული ე.მ. და 1987 წელს დაბადებული ი.გ. დაშავდა.
შეტყობინების საფუძველზე დაწყებული გამოძიებით დადგინდა, რომ ორმა სამოქალაქო პირმა, ამკრაძალავი ნიშნების მიუხედავად, პოლიგონის ტერიტორიაზე მართლსაწინააღმდეგოდ შეაღწიეს, სადაც იპოვეს მცირე ზომის მეტალის ნივთი, სავარაუდოდ ჭურვი, რომელიც ერთ-ერთმა მათგანმა იქვე მოისროლა, რა დროსაც ეს ნივთი აფეთქდა. შედეგადაც ორივე მათგანმა მიიღო სხეულის დაზიანება. ორივე დაშავებული მოქალაქე სამედიცინო დაწესებულებაში გადაიყვანეს, სადაც მათ სამედიცინო დახმარება აღმოუჩინეს. მათ სიცოცხლეს საფრთხე არ ემუქრება.
მომხდარ ფაქტთან დაკავშირებით გამოძიება საქქართველოს სსკ-ის 118-ე მუხლით მიმდინარეობს, რაც ჯანმრთელობის განზრახ ნაკლებად მძიმე დაზიანებას გულისხმობს.

შინაგან საქმეთა სამინისტროს განსაკუთრებულ დავალებათა დეპარტამენტის დირექტორმა გიორგი ყაყიჩაშვილმა, გუშინ, შინაგან საქმეთა სამინისტროს განსაკუთრებულ დავალებათა დეპარტამენტის საბრძოლო მომზადებისა და გადამზადების ცენტრის პოლიგონის მიმდებარე ტერიტორიაზე მომხდარი ფაქტის შესახებ განაცხადა: „ფაქტის შედეგად დაშავებული ორივე მოქალაქე სამედიცინო დაწესებულება „ნიუჰოსპტალში“ იმყოფება და მათ სიცოცხლეს და ჯანმრთელობას საფრთხე არ ემუქრება. დაშავებულთაგან ერთ-ერთს ოპერაცია უკვე ჩაუტარდა. არც ერთი დაშავებული პოლიციელი არ არის, ისინი სამოქალაქო პირები არიან. მათ ფეხისა და მუცლის არეში აღენიშნებათ დაზიანებები. რაც შეეხება თავად ფაქტს, შინაგან საქმეთა სამინისტროს განსაკუთრებულ დავალებათა დეპარტამენტის საბრძოლო მომზადებისა და გადამზადების ცენტრის პოლიგონის მიმდებარე ტერიტორიაზე ორი მოქალაქე სოკოს შესაგროვებლად იმყოფებოდა, როგორც ეს თავად აღნიშნეს. შეგროვების დროს მათ მეტალის ნივთი იპოვეს, რომელიც ერთ-ერთმა მათგანმა მოისროლა, რის შედეგადაც აღნიშნული ნივთიაფეთქდა. ტერიტორია არის დაცული, განთავსებულია ბანერები, სადაც მითითებულია, რომ იქ შესვლა აკრძალულია. გავრცელებული ინფორმაცია, თითქოს აფეთქების დროს მიმდინარეობდა წვრთნები და დაშავებულები იყვნენ პოლიციელები, სიმართლეს არ შეესაბამება. ასევე უნდა აღინიშნოს ის ფაქტი, რომ შინაგან საქმეთა სამინისტროს თანამშრომლებმა ოპერატიულად იმუშავეს და დაშავებულებს პირველადი სამედიცინო დახმარება აღმოუჩინეს, რის შემდეგაც სასწრაფოდ გადაიყვანეს სამედიცინო დაწესებულებაში. დამატებით ინფორმაციას ვერ მოგაწვდით რადგან გამოძიება მიმდინარეობს ჯანმრთელობის განზრახ ნაკლებად მძიმე დაზიანებას ფაქტზე სისხლის სამართლის კოდექსის 118-ე მუხლით. კიდევ ერთხელ აღვნიშნავ, რომ ყველგან არის ნიშნები და ბანერები, რომ ტერიტორია არის დაცული და რომ შესვლა აკრძალულია“ - განაცხადა გიორგი ყაყიჩაშვილმა.