"თქვენი შვილი მთავარი ორგანიზატორი იყო და მ.კ. ს-თან ერთად წინასწარ დაგეგმა რაც უნდა მომხდარიყო"- ზაზა სარალიძე სუბელიანს პასუხობს

სამართალი - 13:18, 21 Apr, 2018

14161

ხორავას ქუჩაზე მოკლული მოზარდის დავით სარალიძის მამამ ზაზა სარალიძე პროკურატურის ყოფილი თანამშრომელს მირზა სუბელიანს პასუხობს.

მისი თქმით, "პოლიტიკური ელფერი ეძლევა დაზარალებულების მიმართ განხორციელებულ მანიპულირებას სუბელიანის ოჯახის წევრებისა და პროკურატურის მხრიდან".

ზაზა სარალიძე პროკურატურას უნდობლობას უცხადებს და ამბობს, რომ საგამოძიებო უწყებისგან ამ დრომდე არ მიუღია პასუხი, რის საფუძველზე აცხადებდა პარლამენტის ყოფილი დეპუტატი ბორის კაკუბავა, რომ დავით სარალიძე მის შვილიშვილს ფულს სძალავდა.

„ბორის კაკუბავა თქვენი ოჯახის წევრია, რომელმაც ღიად დაადანაშაულა ჩემი შვილი თითქოსდა თქვენს შვილს ემუქრებოდა ტუალეტში თავის ჩაყოფით და სძალავდა ფულს, თვეზე მეტია პასუხი ვერ მივიღე პროკურატურიდან რა საფუძველი ჰქონდა ბორის კაკუბავას კომენტარს“, - განაცხადა ზაზა სარალიძემ.

მისივე თქმით, მირზა სუბელიანის შვილი სისხლიანი გარჩევის მთავარი ორგანიზატორია. შვილ მკვდარ მამას კითხვები აქვს „რატომ არ დევს საქმის მასალებში ფარული ვიდეო ჩანაწერები სუბელიანის შვილისა და მისი ნათესავის მ.კ-ს ჩვენების".

"თქვენი შვილი მთავარი ორგანიზატორი იყო ამ ინცინდენტის და წინასწარ დაგეგმა მ.კ. ს-თან ერთად რაც უნდა მომხდარიყო 1-ელ დეკემბერს. ყველა ჩემს მიერ დასმული კითხვა პასუხგაუცემელია თქვენი ყოფილი თანამშრომლებისგან. თქვენ ვერანაირად ვერ უნდა ადევნებდეთ პროცესების მიმდინარეობას თვალყურს და შესაბამისად, არც უნდა იცოდეთ რა ხდება დახურულ პროცესზე. თუ არა პროკურატურა, ვინ გაწვდით ინფორმაციას სამართლიანად მიდის პროცესი თუ უსამართლოდ. მართლაც რომ, სამწუხაროა, ჩემი შვილი და ლევანი თქვენი და თქვენნაირი პირების ოჯახის წევრების მსხვერპლი რომ გახდნენ“, - აცხადებს ზაზა სარალიძე.

საქართველოს პროკურატურის ყოფილი თანამშრომელი მირზა სუბელიანი, ირწმუნება, რომ სიმართლეს არ შეესაბამება ინფორმაცია, თითქოს ის ვანო მერაბიშვილის ციხიდან გაყვანის კადრებით აშანტაჟებს ხელისუფლებას.

აღსანიშნავია, რომ შოთაძის უწყების ყოფილი მაღალჩინოსნის შვილი და ნათესავი მოზარდების მკვლელობის საქმის ფიგურანტები არიან და ორივე მათგანი მოწმის სტატუსის მატარებელია.