დღეს მოზარდების მკვლელობის საქმის ერთ-ერთ მთავარ მოწმეს დაკითხავენ - დაცვის მხარე აცხადებს, რომ არასრულწლოვან მოწმეზე ზეწოლა ხორციელდება

სამართალი - 10:09, 13 Apr, 2018

934

თბილისის საქალაქო სასამართლოში, ხორავას ქუჩაზე მომხდარი სისხლიანი გარჩევის მთავარი მოწმის, პირველი ექსპერიმენტული სკოლის მოსწავლის, მიხეილ კალანდიას დაკითხვა გაგრძელდება, რომელსაც ამავე საქმეზე დანაშაულის დაფარვას ედავებიან. სხდომა 15:00 საათზეა ჩანიშნული.

კალანდია ის არასრულწლოვანია, რომელიც პირველ დეკემბერს ხორავას ქუჩაზე მისი დეიდაშვილის თხოვნით მივიდა, რომელსაც მოზარდებთან კონფლიქტი ჰქონდა. ის წინა სხდომაზე სახელმწიფო ბრალდებამ დაკითხა.

მიხეილ კალანდია დაცვის მხარის შეკითხვებს უპასუხებს. თუმცა ადვოკატები უკვე საუბრობენ იმაზე, რომ მოწმე კალანდიამ ფიცის ქვეშ მიცემული ჩვენებით პროკურატურის ვერსია თავდაყირა დააყენა. მათი თქმით, მოწმემ წინასწარ გამოძიებაში მიცემული რამდენიმე ჩვენება რადიკალურად შეცვალა და გამოძიება ზეწოლაში დაადანაშაულა.

მოწმეზე შესაძლო ზეწოლის შესახებ ვარაუდი ბრალდებულების დაცვის მხარემ გუშინდელი სასამართლო სხდომის შემდეგ გამოთქვა. ადვოკატებმა ტელევიზიების საშუალებით სამართალდამცველებს მიმართეს თხოვნით, დაეცვათ მოწმე ყოველგვარი შესაძლო ზემოქმედებისგან.