სკანდალი: "შსს-ს ექსპერტმა დაადასტურა რომ დაკავებულის მაჯაზე არსებული საათი 02:17 საათს აჩვენებს, რაც ცრუ მოწმის ჩვენებას აცამტვერებს"

სამართალი - 16:55, 11 Apr, 2018

14068

საქალაქო სასამართლოში ბუტა რობაქიძის საქმის განხილვა გაიმართა.

პროცესზე შინაგან საქმეთა სამინისტროს ექსპერტი დაიკითხა, რომელმაც დაადასტურა რომ ერთ-ერთი დაკავებულის მაჯაზე არსებული საათი აჩვენებს დროს 02:17 საათი, რაც არსებითად ეწინააღმდეგება ბრალდების მხარის მოწმის ჩვენებას, რომ გასროლიდან საათნახევრის მერე დუბლები დადგეს.

შინაგან საქმეთა სამინისტროს საზოგადოებასთან ურთიერთობის სამსახურის ყოფილი უფროსი გურამ დონაძე "ნიუპოსტთან" აცხადებს, რომ დღეს დაკითხული ექსპერტის ჩვენება საქმეში ბრალდებულისა და პროკურატურის "ოქროს მოწმის", ზაზა ბაქრაძის ჩვენებას აცამტვერებს, რომელიც ირწმუნება, რომ საქმეში არსებული კადრები დუბლირებულია.

დონაძე სასწრაფო დახმარების ბრიგადის მიერ შედგენილ სამედიცინო დოკუმენტსაც ასაჯაროებს, სადაც ჩანს, რომ სამედიცინო ჯგუფი ადგილზე 02:22 საათზე მიდის, ბუტა რობაქიძე გარდაცვლილი ხვდება შს მაღალჩინოსნები კი შემთხვევის ადგილზე 02: 35 საათზე მიდიან.

"დღევანდელ სასამართლო სხდომაზე გაცამტვერდა ზაზა ბაქრაძის ჩვენება, რომლის მიხედვითაც თითქოს, ის შემთხვევის ადგილზე 50 წუთის შემდეგ მოვიდა და საათნახევრის შემდეგ მოიტანა ზურაბ მიქაძემ იარაღები და მე თითქოს საათნახევრის შემდეგ დავდგი ვიდეო გადაღება და ეს დუბლები თითქოს 3-4-ჯერ არის გადაღებული. დღეს კი შსს-ს ექსპერტიზამ პირდაპირ დაადასტურა, რომ ერთ-ერთი დაკავებულის მაჯაზე არსებული საათი აჩვენებს დროს 02:17 საათს ან მაქსიმუმ 02:25 საათს. ანუ ჩვენი სიმართლე კიდევ ერთხელ დადასტურდა. გასროლა დაახლოებით ამ პერიოდში ხდება, 02:22 წუთზე მიდის სასწრაფო და მას რობაქიძე გარდაცვლილი ხვდება და იარაღებიც ნაპოვნია. სატელეფონო ანძებიდან ამოღებული ინფორმაციით კი გურამ დონაძე, ზურაბ მიქაძე და ირაკლი ფირცხალავა მიდიან 02:35 საათზე, ანუ 20 წუთის ინტერვალში" - განაცხადა გურამ დონაძემ.