მოზარდების მკვლელობა - დამნაშავეებს პროკურატურა ხელისუფლების მითითებით მფარველობს?!

სამართალი - 12:40, 04 Apr, 2018

1999

ხორავას ქუჩაზე მომხდარი სისხლიანი გარჩევის საქმეზე სასამართლო პროცესები მნიშვნელოვან ფაზაში შევიდა.

საქალაქო სასამართლოში, გუშინ გამართულ სხდომაზე ნივთიერი მტკიცებულებები, მათ შორის, ფარული ვიდეო და აუდიოჩანაწერები გამოიკვლიეს. ჩანაწერებში, რომელიც მომხდარის შემდეგ მალევე არის მომზადებული, მოზარდები მკვლელობის დეტალების შესახებ საუბრობენ და მასში პირველად ისმის ვარაუდი, რომ დავით სარალიძეს დანა შესაძლოა, მისმა მეგობარმაც დაარტყა.

როგორც „ნიუპოსტს“ მოკლული არასრულწლოვანის მამამ, ზაზა სარალიძემ განუცხადა, გუშინ წარმოდგენილმა მტკიცებულებებმა კიდევ ერთხელ დაარწმუნა, რომ სკოლის მოსწავლეების მკვლელობის საქმეში ბრალდებულთა წრე იმაზე ფართოა, ვიდრე ამის დამტკიცებას შოთაძის უწყება ცდილობს.

მოკლული დავით სარალიძის მამის თქმით, ფარული ჩანაწერებიდან დასტურდება, რომ ჩხუბის დროს დანა სხვა მოზარდებსაც ჰქონდათ.

„შესაძლებელია, ამათაც (დავით სარალიძისა და ლევან დადუნაშვილის მეგობრებსაც) ჰქონდათ დანა, რადგან მეორე მხრიდანაც ზურგის არეში დაიჭრა ერთ-ერთი, რომელიც ვერ ადასტურებს, ვინ დაჭრა. არც იმას გამოვრიცხავ, რომ დათო მეგობარმა დაჭრა, რადგან მოქნეული და მოზომილი არავის არაფერი დაუნახავს, ჩემს ბავშვს ზურგის არეში აქვს ერთი ჭრილობა მიყენებული და არ არის გამორიცხული, მათი მოქნეულიც იყოს“- უთხრა „ნიუპოსტს“ ზაზა სარალიძემ.

ამასთან, პროცესზე ბრალდების მხარემ სამხარაულის ექსპერტიზის დასკვნა წარადგინა, რომლითაც დასტურდება, რომ დაღუპული დავით სარალიძის სისხლის კვალი სხვა მოზარდის ტანსაცმელზეც არის აღმოჩენილი.

ზაზა სარალიძე „ნიუპოსტთან“ ამბობს, რომ აღნიშნულმა მოწმემ დაკითხვისას სარალიძესთან კონტაქტი უარყო.

სარალიძე აცხადებს, რომ არასრულწლოვანი მოწმე უკვე დაკითხულია და შესაბამისად, სასამართლოზე ვერ მოხდება იმის დადგენა, თუ როგორ აღმოჩნდა მისი შვილის სისხლის კვალი ამ პირის ტანსაცმელზე მაშინ, როდესაც ის სარალიძესთან კონტაქტს უარყოფს.

„თუ მას არ ჰქონდა ჩემს შვილთან შეხება, მაშინ როგორ აღმოჩნდა მის ტანსაცმელზე სისხლი?! ეს მოწმე უკვე დაკითხულია, ის პროკურატურამ დროზე ადრე დაკითხა, რადგან არ გამოვრიცხავ, რომ იცოდა ექსპერტიზის პასუხი და სპეციალურად დაკითხა დროზე ადრე“ - აღნიშნავს ზაზა სარალიძე, რომელიც გამოძიებას უნდობლობას უცხადებს.

„ყველაფერი გაწერილი აქვს პროკურატურას, როგორ უნდა ისაუბრონ მოწმეებმა სასამართლო სხდომებზე. ექსპერტიზის დასკვნა ძალიან საინტერესოა, ვითხოვ იმ მოწმის ხელახლა დაკითხვას, რომელმაც სასამართლოზე ჩემს შვილთან კონტაქტი უარყო. უნდა გაეცეს მთავარ კითხვას პასუხი - თუ არ ჰქონდა ჩემს შვილთან შეხება, მაშინ როგორ აღმოჩნდა მის ტანსაცმელზე სისხლი?!

მედიისა და ჩვენი აქტიური მოქმედებებით, იმედი გვაქვს, რომ გამოვკვეთავთ დამნაშავეთა წრეს. მინიმუმ, ორი ადამიანი გარეთ დადის, რომელიც მკვლელობაში უშუალოდ იღებდა მონაწილეობას. პროკურატურას მათი გამოვლენა არ აწყობს,“ - განაცხადა ჩვენთან საუბრისას ზაზა სარალიძემ.

მან „ნიუპოსტთან“ კიდევ ერთხელ გამოთქვა ვარაუდი, რომ მკვლელობაში ბორის კაკუბავას ერთ-ერთი შვილშვილი ფიგურირებდეს.

„ძალიან მალე მივაკვლევთ ზუსტ ინფორმაციას... როდესაც პროკურატურა ყველაფერს აკეთებს, რომ ვიღაც-ვიღაცების ბრალეულობა დაიფაროს, ალბათ, მითითება ხელისუფლების მხრიდან არის“ - განაცხადა მოკლული ბიჭის მამამ.