სასტუმრო „ლეოგრანდის“ დაკავებული თანამშრომლის, გიორგი მიქელაძის, ოჯახის წევრები გამოძიებას უნდობლობას უცხადებენ და აცხადებენ, რომ მიქელაძე უდანაშაულოა.

„ჩემი მეუღლე საწყობის გამგე იყო, სად სახანძრო უსაფრთხოება და სად მისი მოვალეობა. გაოცებული ვარ, უდანაშაულო პირს მოკიდეს ხელი, ვითხოვ ხელმძღვანელობასთან შეხვედრას და რატომ სცნეს ჩემი მეუღლე დამნაშავედ“, - აცხადებს დაკავებულის მეუღლე, თეა ფუტკარაძე.

გიორგი მიქელაძის ოჯახის წევრები აცხადებენ, რომ ტრაგედიის ღამეს დაკავებული თურქეთში იმყოფებოდა.

დაკავებული უკვე მოინახულა მისმა ადვოკატმა, რომელიც აცხადებს, რომ დაკავებულები დუმილის უფლებას იყენებენ.

"დაკავებულ პირებს ბრალი ოფიციალურად წარედგინათ, ისინი ამ ეტაპზე დუმილის უფლებას იყენებენ. დაცვის მხარე გავეცნობით მასალებს, ჩამოვაყალიბებთ ჩვენს პოზიციებს და წარვსდგებით სასამართლოს წინაშე. მტკიცებულებები ჯერჯერობით არ გვაქვს გადმოცემული. სავარაუდოდ, ხვალ სასამართლო პროცესი გაიმართება“, - განაცხადა ბადრი ბერიძემ.

ბათუმში მდებარე სასტუმრო ლეო გრანდში გაჩენილი ხანძრის საქმეზე, სასტუმროს ორი თანამშრომელი დააკავეს. ერთი მათგანი - თურქეთის, ხოლო მეორე საქართველოს მოქალაქეა.

2017 წლის 24 ნოემბერს ბათუმში, შავშეთის ქუჩაზე მდებარე სასტუმრო ლეო გრანდში ხანძარი გაჩნდა, რის შედეგადაც, შენობაში მყოფი 11 ადამიანი გარდაიცვალა, 19-მა პირმა კი სხეულის დაზიანება მიიღო.