პირადი ცხოვრების ამსახველი კადრების საქმე - შოთაძე ისევ უცხოელი კოლეგების პასუხს ელოდება

სამართალი - 13:20, 22 Mar, 2018

1880

საქართველოს მთავარი პროკურატურა პირადი ცხოვრების ამსახველი ფარული მასალების გავრცელების საქმეზე უცხო ქვეყნებიდან სამართლებრივი დახმარების თხოვნასთან დაკავშირებით პასუხებს ამ დრომდე ელოდება.

როგორც შოთაძემ ჟურნალისტებს განუცხადა, გამოძიება მიმდინარეობს და ჯერჯერობით ფარული ვიდეომასალების გამავრცელებლის ვინაობა დადგენილი არ არის.

„აქ უნდა გაიმიჯნოს ორი რამ, პირველი-ვინ მოახდინა ამ კადრების გადაღება და შენახვა და მეორე, ვინ მოახდინა გავრცელება. გადაღება ამ კადრების განხორციელებულია საქართველოში სამართალდამცავი უწყებების ყოფილი მაღალჩინოსნების მიერ. ამას ჰქონდა ორგანიზებული ხასიათი და ამ ფაქტზე კონკრეტული პირები უკვე დამნაშავედ არიან ცნობილი, მათ შორის კუდ-ის დეპარტამენტის უფროსის მოადგილე და სხვა პირები.

საქართველოს პროკურატურა გამოძიების ფარგლებში ატარებს და ჩაატარა ყველა შესაძლებელი საგამოძიებო მოქმედება. ათეულობით სამართლებრივი დახმარების მოთხოვნა არის გაგზავნილი სხვა ქვეყნებში, რათა მივიღოთ შესაბამისი ინფორმაცია.

"მინდა გითხრათ, რომ ამ ფაილების ატვირთვა საქართველოდან არ მომხდარა, მოხდა უცხოეთიდან. შესაბამისად, ჩვენ მოკლებული ვართ შესაძლებლობას, რომ ჩავატაროთ რაიმე საგამოძიებო და საპროცესო მოქმედება და ამიტომ ველოდებით ამ სამართლებრივი დახმარების შედეგებს,“-აცხადებს შოთაძე.