გახმაურებული საქმეების ცრუ მოწმე ჯოლოხავა იკითხება - უწყებამ გამომძიებლის მხრიდან უფლებამოსილების შესაძლო გადამეტების ფაქტზე გამოძიება დაიწყო

სამართალი - 21:10, 15 Mar, 2018

2083

გოდერძი ჯოლოხავას მიერ გაკეთებულ განცხადებას, რომლის თანახმადაც ის პოლიციის სასარგებლოდ მნიშვნელოვან საქმეებთან დაკავშირებით გამოძიებისთვის სასურველ ჩვენებებს იძლეოდა და ე.წ. ცრუ მოწმე იყო, პროკურატურაში განცხადება გაკეთდა.
პროკურატურის გამომძიებელი დავით გუმბერიძე აცხადებს, რომ შს სამინისტროს პოლიციის დეპარტამენტის გამომძიებლის მხრიდან უფლებამოსილების შესაძლო გადამეტების, მოწმეზე განხორციელებული შესაძლო ზეწოლის და თაღლითობის შესაძლო ფაქტებზე თბილისის პროკურატურამ გამოძიება დაიწყო.
ცრუ მოწმის საქმეზე გოდერძი ჯოლოხავა, რომელიც ერთ-ერთი მთავარი მოწმე იყო თავდაცვის ყოფილი მინისტრის, ბაჩო ახალაიას და გენერალური შტაბის ყოფილი მეთაურის, გენერალ გიგი კალანდაძის საქმეებში, თბილისის პროკურატურაში ამ დრომდე დაკითხვაზე იმყოფება.

„ბაჩანა ახალაიას ბრალდების არცერთ სისხლის სამართლის საქმეზე, სადაც სასამართლო პროცესი მიმდინარეობდა, აღნიშნული პირი მოწმის სახით სასამართლოში დაკითხული არ არის. აქ იყო მის მიერ დასახელებული კონკრეტულად შსს-ის თანამშრომელი, უბნის ინსპექტორ-გამომძიებელი, ვისთანაც მას წლების განმავლობაში აკავშირებდა გარკვეული საქმიანობა, აქედან გამომდინარე, ჩვენ დავიწყეთ გამოძიება იმ ინფორმაციასთან დაკავშირებით, რაც მოწმემ მოგვაწოდა“,- განაცხადა პროკურორმა, დავით გუმბერიძემ.

ცნობისთვის, გოდერძი ჯოლოხავას ჩვენება აქვს მიცემული ყოფილი მთავარი პროკურორის, დავით საყვარელიძის წინააღმდეგაც.