ხდებოდა თუ არა დაკავებულზე ზეწოლა და შანტაჟი - პროკურატურა ზურაბ ნეფარიძის საქმესთან დაკავშირებით განცხადებას ავრცელებს

სამართალი - 17:46, 15 Mar, 2018

2020

თბილისის საქალაქო სასამართლოში მიმდინარეობს საქმის არსებითი განხილვა თბილისის მუნიციპალიტეტის საკრებულოს მაჟორიტარი წევრის - ზ.ნ.-ს მიმართ გამოძალვით ქრთამის აღების, სამსახურებრივი მდგომარეობის გამოყენებით თაღლითურად დიდი ოდენობით თანხის დაუფლებისა და შრომის კანონმდებლობის დარღვევის ფაქტზე, ასევე მაჟორიტარის ბიუროს თანამშრომლის ა.მ.-ს მიმართ სამსახურებრივი მდგომარეობის გამოყენებით დიდი ოდენობით თანხის თაღლითურად დაუფლებაში დახმარების და გამოძალვით ქრთამის აღებაში დახმარების ფაქტზე. დეტალებს საქმის მიმდინარეობის შესახებ პროკურატურა ავრცელებს. უწყება პასუხობს გავრცელებულ ინფორმაციას იმის შესახებ, რომ ბრალდებული ნეფარიძის დაშანტაჟება პირადი ცხოვრების კადრებით ხდებოდა და აცხადებს, რომ ზ.ნ.-ს და ა.მ.-ს ბრალდების საქმეში არსებულ მტკიცებულებებს შორის ბრალდებულების პირადი ცხოვრების ამსახველი რაიმე ვიდეო ან ფოტო მასალა არ არსებობს. ამასთანავე პროკურატურის ინფორმაციით, ზურაბ ნეფარიძის შვილის მიერ გაკეთებულ განცხადებასთან დაკავშირებით, სადაც ის აცხადებდა, რომ მისგან ჩვენება ზეწოლის და შანტაჟის შედეგად მიიღეს, გენერალურ ინსპექციაში სამსახურებრივი შემოწმება დაიწყო:

"ზ.ნ. და ა.მ. საქართველოს უსაფრთხოების სამსახურის ანტიკორუფციული სააგენტოს თანამშრომლების მიერ დაკავებულ იქნენ 2017 წლის 25 აგვისტოს.
გამოძიებით დადგინდა, რომ თბილისის მუნიციპალიტეტის საკრებულოს მაჟორიტარი ზ.ნ. ბიუროში დასაქმებული მეუღლის დის - ა.ნ.-ს დახმარებით ბიუროს ოთხი თანამშრომლისგან, სამსახურიდან გათავისუფლების მუქარით ქრთამის სახით სძალავდა მათთვის ყოველთვიურად დარიცხული ხელფასის ნაწილს. აღნიშნული გზით ზ.ნ.-მ 2014-2017 წლის პერიოდში თანამშრომლებისგან ქრთამის სახით 16040 ლარი გამოსძალა.
ასევე გამოძიებით დადგინდა, რომ ზ.ნ. სამსახურებრივი მდგომარეობის გამოყენებით, მოტყუებით, მართლსაწინააღმდეგო მისაკუთრების მიზნით, დაეუფლა მაჟორიტარის ოფისის ფუნქციონირებისთვის თბილისის მუნიციპალიტეტის საკრებულოს მიერ გამოყოფილ თანხებს, რაშიც დახმარებას უწევდა მისი შვილი.
ზ.ნ-მ თავის ბიუროში ფიქტიურად დაასაქმა მისი შვილის მეგობარი მ.ლ., რომელსაც წინასწარი შეთანხმების თანახმად, ყოველთვიურად ერიცხებოდა ხელფასი, ხოლო რეალურად აღნიშნულ თანხას მართლსაწინააღმდეგოდ ისაკუთრებდა ზ.ნ., რითაც ის 2014 წლის 15 აგვისტოდან 2017 წლის 31 მარტის ჩათვლით თაღლითურად დაეუფლა საკრებულოს კუთვნილ, დიდი ოდენობით 36 552,5 ლარს.
სისხლის სამართლის საქმეზე მიმდინარე გამოძიების ფარგლებში ჩატარდა არაერთი საგამოძიებო და საპროცესო მოქმედება, გამოკითხულ იქნა ათეულობით მოწმე, ჩატარდა საბუღალტრო რევიზიები, დაკავებულების პირადი და მათი ოფისების ჩხრეკა. ბანკებიდან გამოთხოვილ იქნა ინფორმაცია ჩარიცხული თანხების ოდენობასა და მათი მოძრაობის შესახებ. ასევე ჩატარებულ იქნა ფარული საგამოძიებო მოქმედებები, რის შედეგადაც მოპოვებული იქნა ზ.ნ.-ს და ა.მ.-ს დანაშაულში მამხილებელი მტკიცებულებები.
ზ.ნ.-ს და ა.მ.-ს ბრალდების საქმეში არსებულ მტკიცებულებებს შორის ბრალდებულების პირადი ცხოვრების ამსახველი რაიმე ვიდეო ან ფოტო მასალა არ არსებობს.
რაც შეეხება 2018 წლის 15 მარტს მედიასივრცეში ადვოკატის და ბრალდებულ ზ.ნ.-ს შვილის მიერ გავრცელებულ ინფორმაციასთან დაკავშირებით, საქართველოს მთავარი პროკურატურის გენერალურ ინსპექციაში დაიწყო სამსახურებრივი შემოწმება."- აღნიშნულია განცხადებაში.