მოწმეთა მიერ ჩვენებების რადიკალურ შეცვლას ადგილი არ აქვს - რას პასუხობს ბრალდებებს ხორავას ქუჩის საქმის პროკურორი

სამართალი - 15:34, 14 Mar, 2018

1691

ხორავას ქუჩაზე მომხდარი სისხლიანი მკვლელობის საქმის პროკურორი დღესაც ირწმუნება, რომ მოწმეთა ჩვენებების რადიკალურ ცვლილებებს ადგილი არ აქვს.

ზვიად ფხაკაძე აღნიშნავს რომ დღეს დაკითხული მოწმის ჩვენება სრულ თანხვედრაშია იმ ფაქტობრივ გარემოებებთან, რომელიც გამოძიების ეტაპზე დადგინდა.

„დღეს დაკითხულმა მოწმემ ისაუბრა იმ კონფლიქტზე, რასაც ორი არასრულწლოვანის გარდაცვალება მოყვა. მოწმე იყო 51-ე საჯარო სკოლის მოსწავლე. მისი ჩვენების შინაარსზე არასრულწლოვანთა მართლმსაჯულების კოდექსიდან გამომდინარე ვერ ვისაუბრებ, თუმცა გეტყვით, რომ მისი ჩვენება არის ძალიან ინფორმაციული, რასაც ბრალდების მხარე გამოიყენებს დასკვნითი სიტყვის დროს"- აღნიშნა ბრალდების მხარის წარმომადგენელმა.
პროკურორის თქმით, დღეს მიცემულ ჩვენებაზე, ასევე სხვა მტკიცებულებებზე დაყრდნობით, ბრალდების მხარეს აქვს ერთი მოლოდინი, რომ სასამართლო ბრალდებულების მიმართ გამამტყუნებელ განაჩენს გამოიტანს.
ფხაკაძე ამბობს, რომ მოწმის დღევანდელი ჩვენება აბსოლუტურ თანხვედრაშია საქმის გარემოებებთან.
"არ ვიცი დაცვის მხარე რას ეძახის ჩვენებების შეცვლას. სასამართლოზე მოწმის დაკითხვა ხდება მხრეების მიერ, გამოძიების ეტაპზე კი მხოლოდ ერთი მხარის მიერ. შესაბამისად, კითხვებს სვამს ორივე მხარე და დასაკითხ პირებს ბევრი დეტალების დაზუსტება უწევთ. ხაზგასმით შემიძლია ვთქვა, რომ მოწმეთა ჩვენებების რადიკალურ შეცვლას ადგილი არ აქვს“, - განაცხადა ზვიად ფხაკაძემ.

მისივე თქმით, ბრალდების მხარე ექსპერტიზის დასკვნებს, მიღებისთანავე სასამართლოს წარუდგენს.