ბინების ძარცვაში ბრალდებულ საქართველოს 4 მოქალაქეს ესპანეთის სასამართლომ განაჩენი გამოუტანა

სამართალი - 11:57, 08 Mar, 2018

4425

საქართველოს 4 მოქალაქეს, რომელიც ესპანეთის პოლიციამ გასული წლის აგვისტოში დააკავა, სასამართლომ განაჩენი გამოუტანა. ინფორმაციას ამის შესახებ ესპანური მედია ავრცელებს.
დავით ლ-ს და დავიდ ს-ს სამი-სამი წლით პატიმრობა ბინების ძარცვისთვის მიუსაჯეს, რომელსაც ძალადობაც ახლდა, 6-6 თვე კი - ოფიციალური დოკუმენტების გაყალბებისთვის. მათ ასევე, დაეკისრათ ჯარიმის, 540 ევროს გადახდა. ორივე შემთხვევაში, სასამართლოს გადაწყვეტილების თანახმად, მათ ციხეში მისჯილი სამწელწადნახევრიდან 12 თვის გატარება მოუწევთ, შემდეგ კი ესპანეთიდან გააძევებენ და ქვეყანაში შესვლა 6 წლით აეკრძალებათ.

კიდევ ორ დაკავებულს - გაგი კ.ს და ნიკა ტ-ს სასამართლომ 3-3-წლიანი სასჯელი მიუსაჯა, რომლიდანაც ციხეში 9 თვეს გაატარებენ, ესპანეთში შესვლა კი 5 წლით აეკრძალებათ.

ამასთან, ოთხივე დაკავებულს დაეკისრა ერთ-ერთი დაზარალებულისთვის 1.880 ევროს კომპენსაციის გადახდა.

საქართველოს 4 მოქალაქე 2017 წლის 3 აგვისტოს სპეცოპერაციის შედეგად დააკავეს. მათი ავტომობილის სახურავში პოლიციამ ნაქურდალი ნივთები და 11 200 ევრო აღმოაჩინა.

ესპანელი სამართალდამცავების თქმით, მათ ვალიადოლიდში მინიმუმ 4 ბინა გაქურდეს და მომავალი გასაქურდი სახლებიც ქონდათ შერჩეული.