„გავიგუდე, ყელში ნუ მიჭერ“ - 25 წლის ახალგაზრდა პოლიციას ძალადობაში ადანაშაულებს, რას ამბობენ შს სამინისტროში

სამართალი - 12:13, 07 Mar, 2018

3113

მოქალაქე გიორგი ქიტოშვილი სამართალდამცავებს ძალადობაში ადანაშაულებს. 25 წლს ახალგაზრდა თელავში, გუშინ, გვიან ღამით დააკავეს.

მისმა მეგობარმა კი გუშინვე დაკავების ამსახველი ვიდეო გაავრცელა, სადაც ქიტოშვილი ყვირის: „გავიგუდე, ყელში ნუ მიჭერ“.

შინაგან საქმეთა სამინისტროში ძალის გადამეტებას გამორიცხავენ და აღნიშნავენ, რომ ქიტოშვილმა სამართალდამცავებს წინააღმდეგობა გაუწია.

გამოძიება პოლიციელის კანონიერი მოთხოვნისადმი დაუმორჩილებლობის ფაქტზე (საქართველოს ასკ-ს 173-ე მუხლით) მიმდინარეობს.

დაკავებულის მამა, აცხადებს, რომ მისი შვილი იმ ავტომობილს არ მართავდა, რომელიც პოლიციამ გააჩერა.

„ჯარიმა უნდა დაეწერათ, ამან უთხრა, რატომ გვიწერთო... ვის უნდა უჩივლო, სად არის ქვეყანა?!"- აცხადებს დაკავებულის მამა.

გიორგი ქიტოშვილის ბრალდებებს გახარიას უწყებაში უკვე უპასუხეს.

შსს-ის საპატრულო პოლიციის დეპარტამენტის უფროსმა, თეიმურაზ კუპატაძემ განაცხადა, რომ სამართალდამცველებმა პროპორციული ძალა გამოიყენეს და ძალის გადამეტებას ადგილი არ ჰქონია.

„პატრულ-ინსპექტორები კანონის შესაბამისად მოქმედებდნენ და მათ გამოიყენეს პროპორციული ძალა. მოქალქე გიორგი ქიტოშვილი იყო მგზავრი. სამართალდამრღვევ მძღოლს არანაირი პრეტენზია არ ჰქონდა საპატრულო პოლიციასთან, მგზავრი გადმოვიდა და პატრულ-ინსპექტორებს ხელს უშლიდა მათის სამსახურებრივი მოვალეობის შესრულებაში. არაერთგზის მოწოდებისა, რომ ის წასულიყო და დამჯდარიყო მანქანაში, არ ემორჩილებოდა პატრულ-ინსპექტორის კანონიერ მოთხოვნებს. ამის შემდეგ მათ მოახდინეს მისი დაკავება. ვნახე ვიდეოკადრები ასევე სხვა კადრებიც მაქვს ნანახი, პოლიციამ პროპორციული ძალა გამოიყენა. არანაირ გადამეტებას არ ჰქონია ადგილი,“- განაცხადა შინაგან საქმეთა სამინისტროს საპატრულო პოლიციის დეპარტამენტის უფროსმა, თეიმურაზ კუპატაძემ.