„დაქირავებულმა მკვლელმა ერთი გასროლით მოკლა გიორგი“ - გიორგი სანაიას მკვლელობის ახალი დეტალები -

სამართალი - 12:41, 28 Feb, 2018

2464

სამაუწყებლო კომპანია „რუსთავი 2“-ის გადაცემა „პოსტსკრიპტუმში“ გასული სიუჟეტის შემდეგ, გიორგი სანაიას ოჯახის წევრები მთავარ პროკურატურაში კიდევ ერთხელ დაიბარეს, თუმცა ამ ეტაპზე უცნობია, პატიმარ კოტე ციხისთავის მიერ გაკეთებული სკანდალური განცხადებების შემდეგ, ჟურნალისტის მკვლელობაზე ხელახალი გამოძიება დაიწყება თუ არა.

შეგახსენებთ, რომ ციხისთავის თქმით, სანაიას მკვლელობა შეკვეთილი იყო.

რაც შეეხება გიორგი სანაიას ოჯახს, ის დარწმუნებულია, რომ საქმე ფალსიფიცირებულია და პროკურატურამ 17 წლის წინ მომხდარი მკვლელობა თავიდან უნდა გამოიძიოს.

„საქმის კურსში ჩავაყენე, ვუთხარი, რა იყო ჩვენი აზრით, ამ საქმეში არასწორად გაკეთებული და საქმე, პრაქტიკულად, მთლიანად ასეთია, ფალსიფიცირებულია, ყველა ეტაპზე. დღეს ამ შეხვედრის მიზანია, რომ მე დამატებითი ინფორმაცია მივიღო, თუ რა სამართლებრივი საფუძვლებით მიმდინარეობს ამ საქმის შესწავლაში, რაც ეხება ციხის თავის ეპიზოდს,“ - განაცხადა გიორგი სანაიას ძმამ, ვახო სანაიამ, რომელიც პროკურატურაში იმყოფება.

„გიორგი იყო შეკვეთილი მკვლელობის მსხვერპლი, მკვლელობის დღეს, გიორგის მოპარეს სახლის გასაღები, დაქირავებული მკვლელი შეიპარა ჩვენს სახლში და ერთი გასროლით მოკლა გიორგი,“- აღნიშნა სანაიას ყოფილმა მეუღლემ, ხათუნა ჩხაიძემ.