ურთიერთბრალდებები "ბადაგონის" გარშემო - დავით ბეჟუაშვილი ღირსების შელახვისთვის სასამართლოში ჩივის

სამართალი - 16:50, 12 Feb, 2018

1684

კომპანია „ბადაგონის“ ადვოკატის განცხადებით სახელმწიფო უწყებები კომპანიის გაკოტრებას ხელოვნურად ცდილობენ. ზაზა ხატიაშვილი ფინანსთა სამინისტროს საგამოძიებო სამსახურს სიცრუის გავრცელებაში ადანაშაულებს და აცხადებს, რომ უწყებამ მიზანმიმართულად გაავრცელა არასწორი ფაქტები.

ადვოკატის თქმით, მოსამართლის განჩინების მიხედვით, საგამოძიებო მოქმედებები კომპანიაში უნდა ჩაეტარებინათ გამომძიებლებს, ხოლო ფინანსური პოლიციის შესვლის დროს დოკუმენტები IT მენეჯერებმა ამოიღეს.

„მივმართე მთავარ პროკურატურას და მოვითხოვე სისხლის სამართლებრივი დევნის დაწყება ყველა იმ 5 პირის მიმართ, რომლებმაც ეს ვანდალური აქტი ჩაიდინეს და თუ სისხლის სამართლებრივი დევნა არ დაიწყება უმოკლეს დროში, მე ჩავთვლი, რომ საქართველოს პროკურატურა და ფინანსური პოლიცია მოქმედებდნენ ერთად, რათა გაანადგურონ კომპანია „ბადაგონი“ - განაცხადა ზაზა ხატიაშვილმა.

პარალელურად კი, დავით ბეჟუაშვილის ადვოკატმა ღირსებისა და საქმიანი რეპუტაციის შელახვისთვის სარჩელი საქალაქო სასამართლოში შეიტანა. ზვიად კორძაძის თქმით, ინფორმაცია, თითქოს დავით ბეჟუაშვილს კავშირი აქვს "ბადაგონთან" დაკავშირებულ მოვლენებთან, სიმართლეს არ შეესაბამება და მიუხედავად იმისა, რომ მოითხოვეს ამ ინფორმაციის უარყოფა, ეს თხოვნა გათვალისწინებული არ იქნა.

კომპანია „ბადაგონის“ გენერალური დირექტორის გიორგი სალაყაიას განცხადებით, "ბადაგონით" პარლამენტის ყოფილი წევრი, დავით ბეჟუაშვილია დაინტერესებული და კომპანიაში საგამოძიებო მოქმედებების დაწყებაც სწორედ ამას უკავშირდება