საზმაუს კუთვნილი თანხების შესაძლო გაფლანგვის საქმეზე პროკურატურამ გამოძიება დაიწყო

სამართალი - 21:44, 06 Feb, 2018

1528

კვლავ განხილვის თემად რჩება სახელმწიფო აუდიტის დასკვნა, რომლის მიხედვითაც საზოგადოებრივი მაუწყებლის ბორდის ერთ-ერთი წევრი ჰონორარს უფლებამოსილების ამოწურვის შემდეგ, 5 თვის განმავლობაში იღებდა, თანხამ კი მთლიანობაში 12 800 ლარი შეადგინა. აღნიშნული ფაქტით საგამოძიებო ორგანოც დაინტერესდა.

ბორდის ყოფილი წევრი ლელა გაფრინდაშვილი ამბობს, რომ მას მართლაც ერიცხებოდა თანხა, თუმცა მიიჩნევდა, რომ ეს იყო ანაზღაურება კვლევითი სამუშაოსთვის, რომელსაც იგი საზოგადოებრივი მაუწყებლისთვის ეწეოდა. კვლევა ეხება საზოგადოებრივი საბჭოების კონცეფციას. გაფრინაშვილის თქმით, ის პერიოდულად აყენებდა საქმის კურსში ბორდის თავმჯდომარეს და წევრებს კვლევის მიმდინარეობის შესახებ.

სამეურვეო საბჭოს თავმჯომარემ, გრიგოლ გეგელიამ, გაფრინდაშვილთან თანამშროლობის სურვილი დაადასტურა, თუმცა, აცხადებს, რომ ბორდის ყოფილ წევრთან სამეურვეო საბჭოს სამომავლო გეგმებზე არ უმსჯელია. სამეურვეო საბჭოს თავმჯდომარის და წევრების მტკიცებით, მხარეებს არც პროექტის შინაარსი და არც ბიუჯეტი განუხილავთ.

სამოქალაქო სექტორის განცხადებით, ბორდის ყოფილ წევრზე უკონტროლოდ გაცემული ანაზღაურება იმის დასტურია, რომ მაუწყებლის ბორდი და მენეჯმენტი დაკისრებულ მოვალეობას ვერ ასრულებს.

საზოგადოებრივი მაუწყებლის კუთვნილი თანხის შესაძლო გაფლანგვაზე პროკურატურამ სისხლის სამართლის საქმე აღძრა:

პროკურატურის ინფორმაციით მიმდინარეობს გამოძიება სისხლის სამართლის საქმეზე, საზოგადოებრივი მაუწყებლის კუთვნილი თანხის მართლსაწინააღმდეგო გაფლანგვის შესაძლო ფაქტზე. საქართველოს სისხლის სამართლის კოდექსის 182-ე მუხლის მეორე ნაწილით.