მერაბ ღოღობერიძის უფლებადამცველის შემდეგ სააპელაციო სასამართლოში სარჩელი ირაკლიჩხვირკიას ადვოკატმაც შეიტანა. იგი ბათუმის საქალაქო სასამართლოს 10 იანვრის გადაწყვეტილებას ასაჩივრებს, რომლის თანახმადაც ორივე მსჯავრდებული ჯგუფურ მოქმედებაში ცნეს დამნაშავედ და წელიწადითა და 6 თვით თავისუფლების აღკვეთა მიესაჯათ.

„განაჩემო არის უკანონო, დაუსაბუთებელი, მიგვაჩნია, რომ ირაკლი სრულიად უდანაშაულოა წარდგენილ ბრალდებაში. უდავოდ დადასტურდა ის მნიშვნელოვანი გარმეოება, რომ როდესაც ირაკლი ჩამოვიდა ბათუმში, პრაქტიკულად ყველა ძალადობრივი ქმედებები იქნა ამოწურული. ბრალის გადაკვალიფიცირება სწორი იყო, თუმცა მიგვაჩნია რომ 226-ე მუხლთან მიმართებაშიც ირაკლი არის უდანაშაულო.“- განაცხადა ირაკლი ჩხვირკიას ადვოკატმა ბადრი ბერიძემ.

შეგახსენებთ, ბათუმში 11-12 მარტს მომხდარი არეულობის ორგანიზებაში ბრალდებულების, მერაბ ღოღობერიძესა და ირაკლი ჩხვირკიას სასამართლომ სისხლის სამართლის კოდექსის 226-ე მუხლის საფუძველზე 1,6 წლით თავისუფლების აღკვეთა მიუსაჯა.

8 თვიანი სასამართლო პროცესის შემდეგ 11-12 მარტს ბათუმში განვითარებული მოვლენების ორგანიზებაში ბრალდებული მერაბ ღოღობერიძე და ირაკლი ჩხვირკია სასამართლომ საქმის ძირითად ნაწილში გაამართლა. მოსამართლე დავით მამისეიშვილმა ჩათვალა, რომ სისხლის სამართლის კოდექსის 225-ე მუხლი, რომლითაც პროკურატურა მასობრივი არეულობის ორგანიზებას ედავებოდა ბრალდებულებს არ დასტურდება. აღნიშნული მუხლი თავისუფლების აღკვეთას ექვსიდან ცხრა წლამდე ვადით ითვალისწინებდა.

ირაკლი ჩხვირკიას ოჯახმა საქართველოს პრეზიდენტს მსჯავრდებულის შეწყალების თხოვნით მიმართა.