არსებული ინფორმაციით, წითელ ბაღთან მოზარდების დაჭრის საქმეზე ბრალდებული დააკავეს და ამ წუთებში კითხავენ

სამართალი - 13:59, 01 Feb, 2018

2267

„ნიუპოსტის“ ინფორმაციით, თბილისში, წითელ ბაღთან მოზარდების დაჭრაში ბრალდებული დაკავებულია და მას ამ წუთებში გაგარინის მოედანზე არსებულ პოლიციის განყოფილებაში კითხავენ.

როგორც „ნიუპოსტს“ დაჭრილი არასრულწლოვნების მეგობრის ადვოკატმა, რამაზ ჩინჩალაძემ განუცხადა, სავარაუდოდ, დაკავებულია პირი, „ვისაც დანა ეჭირა და მე-12 კლასის მოსწავლეები დაჭრა“.

„ჩემი დაცვის ქვეშ მყოფის დაკითხვა ამ წუთებშიც მიმდინარეობს, ზუსტი ინფორმაცია არ მაქვს, თუმცა, პოლიციის შენობაში მოიყვანეს სავარაუდო ბრალდებული“ - აღნიშნა ადვოკატმა.

თბილისის #35-ე საჯარო სკოლის მოსწავლეები გუშინ დაჭრეს. საქმეზე გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.
როგორც ირკვევა, სისხლიან დაპირისპირებაში კიდევ ერთი მოზარდი მონაწილეობდა.ეს ის ახალგაზრდაა, რომელმაც დაჭრილი მეგობრები საავადმყოფოში გადაიყვანა.

ჩინჩალაძის თქმით, მისი დაცვის ქვეშ მყოფი დაპირისპირებაში მონაწილე პირებს აშველებდა და მსუბუქი დაზიანებები აქვს მიღებული.
„ხელზე სავარაუდოდ ბასრი საგნით აღნიშნული დაზიანება. სავარაუდოდ ცივი იარაღით,“- აცხადებს ადვოკატი.