სისხლიანი გარჩევა და ორი დაჭრილი მოზარდი - პოლიციამ თვითმხილველი დაკითხა

სამართალი - 09:36, 01 Feb, 2018

1673

თბილისში, წითელ ბაღთან მომხდარ სისხლიან გარჩევას, რა დროსაც 2 მოზარდი დაჭრეს პოლიცია იძიებს. შემთხვევის ადგილზე გვიანობამდე მუშაობდნენ ექსპერტ-კრიმინალისტები. სამართადამცავებმა დაჭრილების მეგობრი დაკითხეს, რომელიც ფაქტს შეესწრო.

ცნობილია, დაშავებულები თბილისის #35-ე სკოლის მოსწავლეები არიან. როგორც ირკვევა, მე-12 კლასელებიდან ერთ-ერთი კერძო მასწავლებელთან მიდიოდა, რა დროსაც ის დაჭრეს.

არასრულწლოვანის დაკითხვაზე დასწრება სურდა მის ადვოკატს, თუმცა უფლებადამცველის განცხადებით, მას ამის საშუალება სამართალდამცველებმა დროულად არ მისცეს.

„რა უნდა იფიქრო თუ არა ზეწოლა, თუ არა დანაშაულებრივი ქმედებები სამართალდამცავი ორგანოების მხრიდან, როდესაც არასრულწლოვან, დაკავებულ პიროვნებას არ ახვედრებენ ადვოკატს,“-განაცხადა რამაზ ჩინჩალაძემ.

რესპუბლიკურ საავადმყოფოში ორი დაჭრილი მოზარდი გუშინ საღამოს შეიყვანეს. საქმეზე გამოძიება სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.

რაც შეეხება ჯანმრთელობის მდგომარეობას, ექიმის თქმით, მდგომარეობა სტაბილურია, მოზარდებს ქირურგიული ჩარევა არ დასჭირვებიათ.