შინაგან საქმეთა სამინსტროში გამართულ ბრიფინგზე, მინისტრის მოადგილე ნათია მეზვრიშვილი, მეტრო „თავისუფლების მოედანზე“ მომხდარ ინციდეტს გამოეხმაურა. მეზვრიშვილის თქმით პირებმა რომელთა დაკავებაც სოციალურ ქსელში გავრცელებულ ვიდეოშია ასახული, პოლიციელებს თავისი კანონიერი მოვალეობის შესრულებაში შეუშალეს ხელი:

„სოციალურ ქსელში გამოქვეყნებულ ვიდეოში ასახულია ორი მოქალაქის დაკავება. 2018 წლის 28 იანვარს მეტროსთან შეკრებილ ახალგაზრდებს შორის მოხდა კონფლიქტი, საპატრულო ეკიპაჟის მისვლისას კონფლიქტში მონაწილე რამდენიმე ახალგაზრდა გაიქცა მეტროპოლიტენის მიმართულებით, პატრულ-ინსპექტორებმა ისინი იდენტიფიცირების მიზნით შეაჩერეს, ამ დროს, როდესაც პოლიცია ასრულებდა კანონით მათზე დაკისრებულ მოვალეობას და ახდენდა ახალგაზრდების იდენტიფიცირებას. საპირისპირო მხარეს მოძრავი ესკალატორიდან 1992 და 1982 წელს დაბადებული პირები, რომლებსაც არანაირი კავშირი ახალგაზრდების შეჩერების პროცესთან არ ქონიათ , გამოესარჩლნენ პოლიციის მიერ კანონიერად შეჩერებულ ახალგაზრდებს, გააპროტესტეს კანონიერი ქმედებები, საპატრულო პოლიციის თანამშრომლების მიმართ გამოიჩინეს აგრესია, გადააფურთხეს და მიაყენეს სიტყვიერი შეურაცხყოფა. პოლიციელის შეურაცხყოფა და მის მიმართ აგრესია ისჯება კანონით, განსაკუთრებით მაშინ როცა პოლიცია სამსახურეობრივ მოვალეობას ასრულებს. შესაბამისად პოლიციელებმა შეასრულეს კანონის მოთხოვდა და დაიწყეს ამ პირების ადმინისტრაციული წესით დაკავება. დაკავებისას პირებმა წინააღდეგობა გაუწიეს პოლიციას და განაგრძეს შეურაცხყოფის მიყენება. სწორედ ეს ფაქტია ასახული მოქალაქის მიერ სოციალურ ქსელში გავრცელებულ ვიდეოში. ჩვენის მხრიდან სასამართლოში წარვადგენთ მთლიანი ინციდენტის ამსახველ კადრებს.“- განაცხადა ნათია მეზვრიშვილმა.

შეგახსნებთ, მეტრო „თავისუფლების მოედანზე“ 2 პირი დააკავეს, საქმეზე ძიება ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციისადმი დაუმორჩილებლობა) მიმდინარეობს. ადვოკატები და სამოქალაქო სექტორის წარმომადგენლები პოლიციას უფლებამოსილების გადამეტებაში ადანაშაულებენ.