„მაღალჩინოსნების ჩანაწერებზე საუბარი არ არის“ - „ოცნების“ ყოფილ აქტივისტს ბრალს დღეს წაუყენებენ

სამართალი - 11:23, 26 Jan, 2018

1457

„ქართული ოცნების“ ყოფილი მხარდამჭერი გოგიტა დალაქიშვილი დუმილის უფლებას იყენებს. როგორც ირმა ჭკადუა ამბობს, მისი დაცვის ქვეშ მყოფისთვის ბრალი ამ დრომდე არ წარუდგენიათ.

ამასთან, ადვოკატი არ ადასტურებს მედიით გავრცელებულ ინფორმაციას, რომ დალაქიშვილის საცხოვრებელი ბინიდან აუდიო ფაილებია ამოღებული, რომელშიც მმართველი პოლიტიკური პარტიის მაღალჩინოსნები ფიგურირებენ.

ადვოკატისთვის არც ის ოპერატიული მასალა გადაუციათ, რომელიც შს სამინისტრომ გუშინ გაავრცელა.

„გოგიტა დალაქიშვილის სახლის ჩხრეკის შედეგად არ არის ამოღებული საქმისთვის მნიშვნელოვანი მტკიცებულება, არ არის საუბარი მაღალჩინოსნების ჩანაწერებზე,“ - განაცხადა ადვოკატმა ირმა ჭკადუამ.

გოგიტა დალაქიშვილს ბრალს დღეს წაუყებენ.

შსს-ს ინფორმაციით, დალაქიშვილს ბრალი სისხლის სამართლის კოდექსის 19-158-ე მუხლით წარედგინა.

როგორც ცნობილია, გოგა დალაქიშვილი 2 დღის წინ დააკავეს.

ცნობისთვის, დალაქიშვილმა რომელიც მმართველი პოლიტიკური ძალის აქტიური მხარდამჭერი იყო, "ქართული ოცნების" წინააღმდეგ სკანდალური განცხადება რამდენიმე თვის წინ გააკეთა.

მაშინ ის ირწმუნებოდა, რომ ყოფილი პრემიერი, ირაკლი ღარიბაშვილი მას თანაგუნდელების წინააღმდეგ პროვოკაციებისა და საპროტესტო აქციების მოწყობას ავალებდა.

სატელევიზიო არქივი ინახავს გოგიტა დალაქიშვილის ინტერვიუს, სადაც ეს უკანსკნელი დეტალურად ყვებოდა, რომ ის შსს-ში 2013 წელს დაიბარეს და სასჯელაღსრულების მაშინდელი მინისტრის, სოზარ სუბარის, ყოფილი პროკურორის, არჩილ კბილაშვილისა და თავდაცვის ყოფილი მინისტრის, ირაკლი ალასანიას წინააღმდეგ პროვოკაციებისა და აქციების მოწყობა მოსთხოვეს, სანაცვლოდ კი სოლიდურ თანხას დაჰპირდნენ.

ის ირწმუნებოდა, რომ დამკვეთი ფულს მას შემდეგ იხდიდა, რაც უწყებებში ირაკლი ღარიბაშვილის გავლენა გაიზრდებოდა და სამინისტროები ე.წ. კახური კლანის კადრებით დაკომპლექტდებოდა.