წყნეთის ქუჩაზე მომხდარი ინციდენტს, რომელშიც პროკურატურის თანამშრომელიც მონაწილეობდა, უწყება განცხადებით ეხმაურება. პროკურატურის განცხადებით სიმართლეს არ შეესაბამება ინფორმაცია იმის შესახებ რომ ადგილი ჰქონდა ოჯახურ კონფლიქტს. როგორც განცხადებაშია ნათქვამი, პროკურატურის თანამშრომელს სიტყვიერი და ფიზიკური შეურაცხყოფა მიაყენა მოქალაქემ, რომელიც წყნეთის ქუჩის მიმდებარედ ტაქსით გადაადგილდებოდა.

„საქართველოს პროკურატურის გენერალურ ინსპექციაში დაიწყო გამოძიება პროკურატურის თანამშრომლის მიმართ განხორციელებული ძალადობის ფაქტზე, საქართველოს სისხლის სამართლის კოდექსის 126-ე მუხლის პირველი ნაწილით. გამოძიების დაწყებას საფუძვლად დაედო პროკურატურის თანამშრომლის შეტყობინება, რომ 23 იანვარს, ღამის საათებში, თბილისში, წყნეთის ქუჩის მიმდებარედ მოქალაქემ, რომელიც გადაადგილდებოდა ტაქსით, გზის ვიწრო მონაკვეთზე უპირატესი გავლის მოთხოვნით სიტყვიერი და ფიზიკური შეურაცხყოფა მიაყენა კუთვნილი ავტომანქანით მოძრავ პროკურატურის თანამშრომელს, რის შემდეგაც საპატრულო პოლიციის ეკიპაჟის გამოჩენის შემდეგ ადგილიდან მიიმალა. საქმეზე ტარდება ყველა საჭირო საგამოძიებო და საპროცესო მოქმედება. ცალსახად უნდა აღინიშნოს, რომ მომხდარი არ უკავშირდება პროკურატურის თანამშრომლის პროფესიულ საქმიანობას, ამასთანავე სიმართლეს არ შეესაბამება ინფორმაცია იმის შესახებ, რომ თითქოს ადგილი ჰქონდა ოჯახურ კონფლიქტს.“- აღნიშნულია უწყების განცხადებაში.