ვინ არის ჩატაევის და მისი დაჯგუფების დახმარებისთვის დაკავებული ბერძენიშვილი და რა აკავშირებს მას ასევე დაკავებულ მარგოშვილთან

სამართალი - 16:24, 23 Jan, 2018

2365

ახმედ ჩატაევის და მისი დაჯგუფების დახმარებისთვის დაკავებულის ანატოლი ბერძენიშვილის ოჯახის წევრები და მეზობლები, მის ტერორიზმთან კავშირს კატეგორიულად გამორიცხავენ.

ანატოლი ბერძენიშვილის მეზობლები კი ჰყვებიან, რომ ბერძენიშვილი წლების განმავლობაში ბიზნეს საქმიანობას ეწეოდა და ასევე ტაძრების მშენებლობით იყო დაკავებული.

„ტაძრებს აშენებს როგორც ვიცი, მორწმუნე ადამიანია და აშენებს. ვიცნობდი როგორც მეზობელი,“ - განაცხადა ბერძენიშვილის მეზობელმა.

ანატოლი ბერძენიშვილი დუმილის უფლებას იყენებს და ბრალს არ აღიარებს.

„ის არანაირ დანაშაულს არ აღიარებს, გამოყენებული აქვს კანონით მინიჭებული დუმილის უფლება და აქედან გამომდინარე, მე არანაირი ინფორმაციაც არ მაქვს და თვითონ არანაირი სურვილი არ აქვს, რომ ამ თემასთან დაკავშირებით ილაპარაკოს. ხშირად დადიოდა თურქეთში თავის საქმიანობიდან გამომდინარე. ბერძენიშვილი აშენებდა ტაძრებს და ხშირად უწევდა საზღვრის გადალახვა,“ - აცხადებს ბერძენიშვილის ადვოკატი მაია სირაძე.

უფლებადამცველი ინგა ბოლოთაური კი ამბობს, რომ ბერძენიშვილი პანკისის ხეობაში ჩატარებული სპეცოპერაციის შედეგად დაკავებული რამაზ მარგოშვილის მეგობარია.

„პანკისთან კავშირები ჰქონდა, ანატოლი ბერძენიშვილი და ხიზირ, იგივე რამაზ მარგოშვილი არიან მეგობრები. მტკიცებულებები, რომ ჩემი დაცვის ქვეშ მყოფი პირების მიერ ჩადენილი არის დანაშაული, ასეთი მე არ გამაჩნია,“ - განაცხადა ანატოლი ბერძენიშვილის ადვოკატმა ინგა ბოლოთაურმა.

საქართველოს მოქალაქე ანატოლი ბერძენიშვილი სახელმწიფო უსაფრთხოების სამსახურის კონტრტერორისტული დეპარტამენტის მიერ, სასამართლოს განჩინების საფუძველზე, გუშინ, თბილისში დააკავეს.

სუს-ის ოფიციალური ინფორმაციით, გამოძიების ამ ეტაპზე დადგენილია, რომ დაკავებული ანატოლი ბერძენიშვილი ჩავიდა თურქეთში ახმედ ჩატაევის და მისი დაჯგუფების წევრების დასახმარებლად. დაკავებულმა, ზურაბ გორნაკაშვილთან და ზურაბ იდოიძესთან ერთად,ახმედ ჩატაევს და მისი დაჯგუფების წევრებს დახმარება გაუწია თურქეთ-საქართველოს საზღვართან, კირნათი-მარადიდის მწვანე ზოლის მონაკვეთამდე გადაადგილებაში.

გამოძიება საქართველოს სსკ-ის 331- ე პრიმა მუხლის მესამე ნაწილით მიმდინარეობს,რაც ტერორიზმის დაფინანსებას ,ტერორისტული საქმიანობის სხვაგვარ მატერიალურ მხარდაჭერას ან რესურსებით უზრუნველყოფას გულისხმობს,რამაც მძიმე შედეგი გამოიწვია. სასჯელის ზომად 17 დან 20 წლამდე ვადით ან უვადო თავისუფლების აღკვეთას ითვალისწინებს.