გენერალ სამსონ ქუთათელაძის მკვლელობის საქმის ფარგლებში დაკავებულ გიორგი ჭანტურიას ადვოკატის თქმით, კონკრეტული პირები ქუთათელაძისთვის ფულის გამოძალვას ცდილობდნენ, თუმცა ისინი გამოძიებას ამ დრომდე არ დაუკითხავს. ადვოკატ ანა კეკელიძის განცხადებით, ეს ინფორმაცია მისთვის იმის გამოა ცნობილი, რომ ჭანტურიას საქმე ამ დრომდე გამოყოფილი არ არის სამსონ ქუთათელაძის მკვლელობის საქმიდან. შესაბამისად, ადვოკატს კვლავაც აქვს წვდომა ამ საქმის მასალებთან.

„იმ ჩვენებებში, რომელიც ჩვენ ხელთ გვაქვს, საუბარია სამსონ ქუთათელაძესა და სხვა პირებს შორის გარკვეულ დაძაბულ ურთიერთობებზე, ასევე საუბარია იმაზე, რომ სამსონ ქუთათელაძეს გარკვეული პირები სთხოვდნენ თანხასაც და ისინი არ არიან დაკავებულები, ისინი არ იმყოფებიან პოლიციის განყოფილებაში, მაშინ, როცა უდანაშაულო ადამიანი გამოკეტილია მრავალი საათია,“ - ანა კეკელიძემ.

გიორგი ჭანტურია სამართალდამცველებმა გენერალ სამსონ ქუთათელაძის მკვლელობის საქმეზე დაკითხეს, დაკითხვის შემდეგ კი ჭანტურიას მშობლების სახლში ჩატარდა ჩხრეკა. საგამოძიებო მოქმედებების შედეგად ამოღებულია "მაკაროვის" ტიპის იარაღის 9 ვაზნა. ადვოკატების ინფორმაციით, ჭანტურიას გამოძიება სწორედ საბრძოლო მასალის უკანონო შენახვას ედავება.

ჭანტურიას დის თქმით, პოლიცია ყოფილი პროკურორისგან გენერალ ქუთათელაძის მკვლელობის აღიარებას ითხოვდა.

გიორგი ჭანტურიას ოჯახი გამოძიების გადაწყვეტილებას ელოდება, 6 საათის შემდეგ კი ოჯახი ერთობლივ განცხადებას გაავრცელებს.